Конклав буюу кардиналуудын чуулганы эхний санал хураалтаар шинэ Пап лам сонгогдоогүйг илтгэж Сикстиний сүмийн яндангаас өтгөн хар утаа гарсан юм. Ватиканы Сикстин сүмд гадаад ертөнцөөс бүрэн тусгаарлагдсан 133 кардинал хуралдаж, нууц санал хураалтаар дараагийн Пап ламыг сонгодог. Тэгвэл хурлын хоёр дахь өдөр Кардинал Роберт Франсис Превост (Robert Francis Prevost) Католик сүмийн 267 дахь тэргүүн болон Ватикан хот улсын төрийн тэргүүнээр сонгогдлоо.
Тэрбээр ийнхүү Ромын папын суудал заларч, Лео XIV хэмээн нэрлэгдэх болж байна. Вилланова их сургуулийн төгсөгч Лео XIV нь АНУ-аас сонгогдсон анхны Ромын пап болж буй бөгөөд мөн анхны Августин лам хувраг юм. 69 настай Лео нь Чикаго хотоос гаралтай бөгөөд карьерынхаа ихэнх хугацааг Өмнөд Америкт номлогчоор ажиллаж өнгөрүүлсэн, АНУ, Перугийн давхар иргэншилтэй юм байна.
Лео XIV пап ламын хувиар анхны үгээ Гэгээн Петрийн сүмийн тагтан дээрээс олон арван мянган хүний өмнө айлджээ. Тэрбээр даян дэлхийд энх тайвныг уриалж, талийгаач Пап лам Францискт хүндэтгэл үзүүлжээ.
Шинээр сонгогдсон Пап ламд дэлхийн удирдагчид баяр хүргэсэн бөгөөд тэд олон улсын энх тайван, хамтын ажиллагааны асуудлаар хамба ламтай хамтран ажиллах хүсэлтэй байгаагаа илэрхийлжээ. АНУ-ын Ерөнхийлөгч Дональд Трамп энэхүү түүхэн сонгон шалгаруулалтыг тус улсын хувьд нэр төрийн хэрэг хэмээн онцолсон байна.
Гэрэл зургийн эх сурвалж: Francesco Sforza/Vatican Media
