Японы мэргэжлийн сүмогийн хацү башёгийн дөрөв дэх өдөр озэки Киришима Б.Лхагвасүрэн маэгаширагийн баруун жигүүрийн хоёр дахь бөх Мидорифүжид өвдөг шороодлоо. Японы хэвлэлд түүний энэ ялагдлыг онцолж байна. Учир нь Киришима озэки энэ сард 10 болон түүнээс дээш давж, түрүүлэх хэмжээний өрсөлдөөнд орж чадвал их аварга цолны болзол сонсох юм. Тиймээс хацү башёгийн даваа бүхэн түүний хувьд өндөр хариуцлагатай гэсэн үг. Башё эхлэхээс өмнө ч сүмогийн мэргэжилтнүүд Киришимаг онцлон бичиж, түүнийг их сүмод шинэ эрин үеийг эхлүүлэх үү гэж таамаглаж байсан юм.
Өнөөдөр их аварга Тэрүнофүжи учраа бөх маэгаширагийн гуравт эрэмбэлэгдсэн Гонояамаг давж гурван даваа, нэг унаатай болжээ. Озэки Хоошорюү С.Бямбасүрэн учраагаа давснаар өвдөг шороодолгүй башёг амжилттай үргэлжлүүлж байна. Хокүсэйхо А.Даваанинж /1-3/, Тамаваши Б.Мөнх-Оргил /2-2/ нар өнөөдөр өвдөг шорооджээ.
