Европын удирдагчид цагаачлалын асуудлаар тохиролцоонд хүрч чадсангүй

Европын холбооны удирдагчдын албан бус уулзалт Испанийн Гранада хотод болжээ. Уулзалтын үеэр Европын холбооны удирдагчид урт хугацааны стратеги, өргөжин тэлэх асуудал, мөн цагаачлалын сэдвээр хэлэлцээ хийсэн ч цагаачлалын асуудлаар хараахан тохиролцоонд хүрч чадсангүй. Цагаачлал нь Европын холбооны гишүүн орнуудын дунд хамгийн их маргаан дагуулдаг асуудлын нэг байсаар ирсэн. Уг уулзалтын дараа нийтэлсэн Гранадагийн тунхаглалд ч цагаачлалтай холбоотой асуудлыг ер дурдсангүй. Европын зөвлөлийн ерөнхийлөгч Чарльз Мишель зөвхөн өөрийн нэрийн өмнөөс цагаачлалын асуудлаар бие даасан мэдэгдэл хийсэн байна.