Японы мэргэжлийн сүмогийн нагоя башё өнөөдөр Нагоя хотын Dolphins Arena-д эхэллээ. Их аварга Тэрүнофүжи Г.Ган-Эрдэнэ комүсүби Абигээр эхний даваагаа авав. Харин шинэ озэки Киришима Б.Лхагвасүрэн нурууны бэртлийн улмаас барилдалгүй хийлж, башёг өнжихөөр болжээ. Тэрбээр өнгөрсөн мягмар гарагт бэлтгэлийн үеэр гэмтэл авсан бөгөөд баасан, бямба гаргуудад бэлтгэлдээ гарч чадаагүй байна. Мичиноку оякатагийн хэлснээр Киришима баасан гаргийн орой нуруу өвдөж байгаагаа хэлжээ. Киришима нурууны өвдөлт гайгүй бол нагоя башёгийн дундуур барилдаж эхлэх бодолтой байгаа гэдгийг Мичиноку ояката ярьсан байна. Киришима ирэх есдүгээр сард Токиод болох намрын башёд кодобан буюу наймаас дээш давж цолоо хамгаалах болзолтойгоор барилдах болж байгаа юм.
Өнөөдөр Хоошорюү С.Бямбасүрэн маэгаширагийн тэргүүн бөх Тобизарүг, Хокүсэйхо А.Даваанинж маэгаширагийн тав дахь бөх Оношог, Тамаваши Б.Мөнх-Оргил маэгаширагийн найм дахь бөх Саданоумиг тус тус давжээ.
