Дэлхийн эмч нарын өдөр өнөөдөр тохиож байна. Энэ өдөр дэлхийн олон улс оронд цагаан нөмрөгт эмч нартаа талархал илэрхийлдэг уламжлалтай. Уг өдрийг АНУ-д 1933 оны гуравдугаар сарын 30-нд анх тэмдэглэж эхэлсэн түүхтэй аж. Харин 1990 оны гуравдугаар сарын 30-наас албан ёсоор “Үндэсний эмч нарын өдөр” болгон эмч нартаа баярлаж талархсанаа илэрхийлэн таниулж сурталчилдаг Олон улсын өдөр болж өргөжсөн юм байна.
Дэлхийн эмч нарын өдөр улс орны хэмжээнд эрүүл мэндийн салбарыг хөгжүүлэх, хүн ардынхаа эрүүл мэндийг сахин хамгаалах үйлст үр бүтээлтэй ажиллаж онцгой амжилт гаргасан эмч нарын хөдөлмөрийн үнэлэмжийг дээшлүүлэх, эмчилгээ, оношилгоо, үйлчилгээний ажлын шилдэг арга туршлагыг олон нийтэд сурталчилах, дэлгэрүүлэн таниулах зорилготой олон талт үйл ажиллагааг зохион байгуулж тэмдэглэдэг.
Энэ өдрийг тохиолдуулан эмч хэмээх эрхэм хүндтэй мэргэжлийг эзэмшин, хүмүүний амь нас, эрүүл мэндийн төлөө мэдэх, чадах бүхнээ зориулдаг, мэдлэгтэй, зүтгэлтэй, сэтгэлтэй, ур чадвартай үе үеийн эмч нартаа Монгол Улсын Эрүүл мэндийн сайд С.Энхболд мэндчилгээ дэвшүүлжээ.
