Сонгуулийн ерөнхий хороо ээлжит мэдээллийнхээ үеэр 17.00 цагийн байдлаар сонгуулийн ирц 52.6 хувьд хүрснийг зарласны зэрэгцээ энэ жилийн сонгуулийн сонирхолтой статистикуудыг танилцууллаа. 2020 оны УИХ-ын сонгуульд сонгогчдын нэрсийн жагсаалтад нийт 2,000,624 хүний нэр бүртгэгдсэнээс 17.00 цагийн байдлаар 1,054,138 сонгогч саналаа өгчээ.
Сонгогчдыг насны ангиллаар авч үзвэл 35-аас доош насныхан 41 хувь, 35-аас дээш насныхан 59 хувийг эзэлж байгаа юм байна. Өнөөдөр буюу сонгуулийн санал хураалт болох өдөр зургаадугаар сарын 24-нд 18 нас хүрч буй 130 сонгогч саналаа өгч байгаа юм байна. Сонгогчдын нэрсийн жагсаалтад 100-гаас дээш настан 92 бүртгэгдсэнээс хамгийн ахмад нь 113 настай ажээ. Хамгийн олон хэсгийн хороотой тойрог нь Хөвсгөл аймгийн 17-р тойрог бөгөөд тус тойрог нийт 129 хэсгийн хороо ажиллаж байгаа юм байна.
