А.Баяр: Зүрх сэтгэлээсээ эх орноо хөгжүүлнэ гэсэн үзэлтэй бодолтой, итгэл үнэмшилтэй ирээдүйн иргэдийг бид төлөвшүүлэх чухал
“Тусгаар тогтнол” шүлгийг 3333 сурагч Сүхбаатарын талбайд уншлаа. Монгол Улсын Хөдөлмөрийн баатар, Ардын уран зохиолч Дэндэвийн Пүрэвдоржийн “Тусгаар тогтнол” шүлгийг жил бүрийн дөрөвдүгээр сарын эхний долоо хоногт ЕБС-ийн сурагчид уншиж, эх оронч сэтгэл, тусгаар тогтнолын ухагдахууныг шүлгээр дамжуулан илэрхийлдэг билээ. Энэхүү уламжлал болоод буй арга хэмжээг анх 2016 онд Нийслэлийн ЕБ-ын “Оюуны ундраа” сургууль санаачилан зохион байгуулж тус сургуулийн 3333 сурагч Сүхбаатарын талбай дээр уншиж, олноо хүргэж байв. Тэгвэл өнөөдөр жил 9 дэх жилдээ “Тусгаар тогтнол” шүлгийг 3333 сурагч Сүхбаатарын талбайд уншиж, олны сонорыг мялаалаа.
Нээлтийн үеэр НИТХ-ын дарга А.Баяр “Аль ч улс орны хамгийн гол зүйл бол эх оронч үзэлтэй иргэдтэй байх. Эх оронч үзэлтэй монголчууд гэж хэлэхээс илүүтэйгээр зүрх сэтгэлээсээ эх орноо хөгжүүлнэ гэсэн үзэлтэй бодолтой, итгэл үнэмшилтэй ирээдүйн иргэдийг бид төлөвшүүлэх чухал. Энэ үүднээс “Тусгаар тогтнол” шүлгийг улсынхаа төв талбайд унших арга хэмжээг дэмжиж ажилласан. Цаашдаа ч эх оронч үзэлтэй хүүхэд, залуусынхаа санаачилсан ажлыг дэмжиж ажиллах болно” хэмээн онцоллоо.
С.Нэргүйдаваа: Монголын өв соёл, эх хэл, эх орон энэ шүлгэнд бүхлээрээ шингэсэн
Түүнчлэн уг арга хэмжээг санаачилсан “Оюуны ундраа” сургуулийн захирал С.Нэргүйдаваа “Манай сургуулиас үндэсний хэмжээг хамарсан хөтөлбөр болгон хөгжүүлж байна. Энэ удаа зөвхөн нийслэлд төдийгүй 21 аймгийн төв талбайд, Монголын эзэнт гүрний нийслэл Хархорум, их зохиолчийн төрсөн нутаг Монгол Улсын төв цэг Бүрд сумдад уншлаа. Энэхүү шүлгийг монголын хүүхэд бүр мэддэг байх ёстой. Монголын өв соёл, эх хэл, эх орон энэ шүлгэнд бүхлээрээ шингэсэн тул ирээдүй хойч үедээ Монгол Улсын тусгаар тогтнол, эрх чөлөөний үнэ цэн, утга учрыг ойлгуулах, өнгөрсөн одоо ирээдүй үеийн оюун санааны нэгдлийг хангах, эх оронч үзлийг төлөвшүүлэх, эх хэлний соёлыг өвлүүлхэд хөтөлбөрийн зорилго оршино” гэв.
С.Нэргүйдаваа захирал 9 жилийн өмнө “Тусгаар тогтнол” шүлгийг сурагчдаараа Сүхбаатарын талбайд уншуулах санаачилга гаргаж ажил хэрэг болгосноос хойш “Яруусахуйн дуулал” нэртэй уг арга хэмжээг жил бүр тасралтгүй зохион байгуулж иржээ. Энэ жил “Тусгаар тогтнол” шүлгийн уншлага ийнхүү 21 аймаг, 9 дүүрэг, эзэнт гүрний нийслэл Хархорин хот болон Хөдөлмөрийн баатар, Төрийн шагналт, Ардын уран зохиолч, их найрагч Дэндэвийн Пүрэвдоржийн төрсөн нутаг Өвөрхангай аймгийн Бүрд суманд зэрэг боллоо. “Яруусахуйн дуулал” уншлагын цомыг нийслэлийн дүүргүүд жил жилээр ээлжлэн түүчээлсэн бөгөөд цаашид орон нутагт аялуулах юм байна. Дараа жилийн “Яруусахуйн дуулал” уншлагыг эзэн Чингис хааны өлгий нутаг Хэнтий аймаг зохион байгуулахаар шилжин явах цомыг гардан авчээ.
