Монголын тухай цогц үзэсгэлэн Дарвины музейд гарна

Монгол, Оросын хамтарсан биологийн судалгааны ангийн 50 жилийн ойд зориулсан “Монголия далёкая-близкая” үзэсгэлэнгийн нээлт Москвагийн Дарвины музейд болох гэж байна. XIX зууны дунд үеэс эхлэн Оросын газар зүйн нийгэмлэгийн судлаачид Монголыг сонирхон судалж эхэлсэн. Улмаар газар зүй, угсаатны зүй, хэл шинжлэл, археологи, палентологийн далайцтай судалгаа хийж, Монгол Улсын нутаг дэвсгэрээс олдсон эртний амьтан, ургамлын дээжийг цуглуулсан юм. Зөвхөн XIX-XX зуунд Оросын судлаачид Монголыг тойрсон олон нууцыг тайлжээ.
Николай Пржевальский, Григорий Потанин, Михаил Певцов, Петр Козлов, Григорий Грум-Гржимайло, Иван Ефремов, Андрей Банников зэрэг судлаачийн Монгол, Төв Ази судлалд оруулсан хувь нэмрийг өнөө үеийнхэнд сурталчлахад үзэсгэлэнгийн зорилго оршиж буй аж. Эдгээр судлаач бол Монгол, Оросын хамтарсан экспедицийн суурийг тавьсан гавьяатай. Оросуудын хувьд ойрхон атлаа хол, нууцлаг Монгол орны соёл, түүх, ховор ан амьтдын тухай онцгой үзмэрүүдийг олон нийтэд дэлгэх юм. Тухайлбал, XIX-XX зууны эхэн үеийн монголчууд үндэсний хувцас, шашны зан үйлийн өвөрмөц баг, монгол гэрийн тавилга, газарзүйн зураглалаас гадна Монголын тал нутагт судалгааны ажил хийсэн эрдэмтдийн бүтээлээс толилуулахаар зэхжээ. Үүнд Оросын судлаач Вячеслав Кожемякиний 1971-1973 онд Монгол, Зөвлөлтийн хамтарсан экспедицэд ажиллаж байхдаа цуглуулсан ашигт малтмалын 97 дээжийг анх удаа дэлгэх юм.
Мөн Монгол Улсын бэлгэ тэмдэг болсон тахийн тухай тусгай тасагт К.Флеров, А.Комаров, В.Ватагин, Г.Никольский нарын судалгааны зураг, В.Трофимовын баримлыг нийтэд үзүүлэхээр зэхжээ.
Түүнчлэн Дарвины музейн зохион байгуулагчдын хэлснээр XIX зууны үеийн монгол дархчуудын урласан бурхад үзэсгэлэнгийн гол үзмэр байх аж. Мөн монгол зээр, улаан чоно, тахь зэрэг хөхтөн амьтдын чихмэлийг “Монголия далёкая-близкая” үзэсгэлэнд тавихаар болжээ.