Авто тээврийн үндэсний төвийн даргын 2020 оны нэгдүгээр сарын 29-ний өдрийн А09 тоот тогтоол гарч тээврийн хэрэгслийн жолооч бүртгэхтэй холбоотой бүх төрлийн сургалт болон шалгалт зохион байгуулах үйл ажиллагааг зогсоож, сургалтын бүртгэлийн программыг түр хаах чиглэл гарсан. Харин тавдугаар сараас сургалтын үйл ажиллагааг шат дараатай нээх болсон тул Мэргэжлийн хяналтын байгууллагын зөвлөмжийг баримтлан жолооны шалгалтыг эхлүүлжээ.
Хөл хорио тогтоохоос өмнө жолооны сургалтын төвд бүртгүүлж, шалгалт өгөх эрх үүссэн, шалгалтдаа тэнцээгүй иргэд ийнхүү шалгалтдаа хамрагдах боломжтой болоод байна. Нийт 3637 жолооч энэ сард шалгалтад хамрагдах ажээ. Эдгээр жолооч нар “Нисдэг машин” төвд байрлах Авто тээврийн үндэсний төвийн харьяа салбарт очиж шалгалтаа өгөх болох юм. Ингэхдээ хувь хүн эрүүл мэндийн хуудсаа бөглүүлсэн байх бөгөөд амны хаалт зүүж, нэг удаагийн резинэн бээлий өмсөж, COVID-19-ийн халдвараас урьдчилан сэргийлэх дэглэмийг баримтлах ёстой.
Мөн хөдөө орон нутагт байгаа жолооны шалгалтаа өгч амжаагүй иргэд 21 аймаг дахь Авто тээврийн үндэсний төвийн салбаруудад хандан онлайнаар шалгалтаа өгч болно гэдгийг Авто тээврийн үндэсний төвийн шалгалтын мэргэжилтэн Ч.Болд онцоллоо. Жолооны шалгалтад хамрагдах хугацаа ирэх долоодугаар сарын 08-нд дуусах юм байна.
