Нийслэлийн Засаг дарга бөгөөд Улаанбаатар хотын захирагчийн зарласан “Нэг хот-Нэг стандарт” зорилтот жилийн хүрээнд авто замын тэмдэг, түүний стандартыг норм нормативийн дагуу байршуулсан эсэхэд Нийслэлийн замын хөдөлгөөний төлөвлөлт, зохицуулалт, инженерчлэлийн газрын алба хаагчид Их тойруугийн бүсэд замын тэмдэгт үзлэг, шалгалтын ажлыг хийжээ. Түүнчлэн Тээврийн цагдаагийн албанаас ирүүлсэн 2020 онд Нийслэл Улаанбаатар хотын хэмжээнд хийж хэрэгжүүлэх авто замын техник хэрэгслийн судалгаатай танилцан Их тойруу дахь үзлэгийн ажлын үр дүнг нэгтгэх зорилготойгоор дүүргүүдийн Замын цагдаагийн азрын хэлтэс тасгуудын дарга, ахлах зохицуулагч нартай уулзалт хийсэн байна. Уулзалтын үр дүнд зам барилгын ажил хийж эхлэх үед илэрсэн алдаа дутагдлыг засаж залруулан стандартын шаардлагад нийцүүлэн шинэчлэх талаар харилцан тохиролцжээ. Ингэснээр нийслэл хотын зам, замын байгууламж, тэмдэг тэмдэглэгээг өнгө үзэмжтэй болгох, стандартыг баримтлах, жолооч, явган зорчигчидод илүү ойлгомжтой болгох юм.
Нийслэлийн төвийн бүс болох Их тойрууд шинээр хийгдэх болон засвар шинэчлэлт хийгдэх нийт 70 уулзварын 1529 ширхэг авто замын тэмдгийн бүдүүвч зураглалыг хийж гүйцэтгэн холбогдох байгууллагын дарга инженерүүдээр хянуулан батлуулсан байна. Батлагдсан бүдүүвч зураглалын дагуу тухайн замын тэмдэг байршигдаж буй эсэхэд холбогдох газруудын хамт хяналтаар ажиллах төлөвлөгөөтэй ажиллаж байна. Цаашид авто замын хэвтээ тэмдэглэгээ буюу цагаан зураасыг олон улсын хэрэглээнд нэвтэрсэн байдлаар хийж хотын өнгө үзэмжийг нэмэхээр ажиллаж байна.
