Манай улсад тусгай үүргийн онгоцоор ирээд тусгаарлагдан хянагдаж байсан Турк улсын хоёр иргэнээс коронавирус илэрчээ. Тиймээс уг хоёр иргэн болон ойрын хавьтлын 10 хүнийг тусгаарлан, тандалт судалгаа, эмчилгээ хийж эмчийн хяналтад аваад байгаа юм байна. Энэхүү хоёр турк иргэн БНСУ-аас өөрийн иргэдээ авахаар манай улс руу нисгэсэн тусгай үүргийн онгоцоор ирсэн юм байна. Тэд Монгол дахь Туркийн Элчин сайдын яамны ажилтны ар гэрийнхэн аж. Тэднийг ирэхэд шууд тусгаарласан бөгөөд шинж тэмдэг илрээгүй боловч лабораторийн шинжилгээгээр коронавирус илэрчээ.
Коронавируст халдвар COVID-19-ийн шинж тэмдэг илрэхгүйгээр өвчлөх тохиолдол сүүлийн өдрүүдэд нэмэгдэж байгаа талаар ЭМЯ-наас мэдээллээ. Тиймээс иргэдийг амны хаалтаа заавал хэрэглэж, эрүүл ахуйн дэглэмээ сахихыг анхааруулж байна. ХӨСҮТ-д өнөөдрийн байдлаар 221 хүн тусгаарлагдан хянагдаж байгаа юм байна. Түүнчлэн “Токио-Улаанбаатар” чиглэлийн тусгай үүргийн онгоцоор ирсэн 25 хүний шинжилгээнээс коронавирус илрээгүй бөгөөд тандалтаар авсан 23 хүний шинжилгээнээс мөн коронавирус илрээгүй байна.
