Улсын онцгой комиссын Шуурхай штабаас өнөөдөр ээлжит мэдээллээ хийлээ. Энэхүү мэдээллийн үеэр МХЕГ-аас иргэдэд хандан тодорхой мэдээлэл, анхааруулга өгсөн юм. Уг мэдээллийг багцлан хүргэе.
Юуны өмнө дөрөвдүгээр сарын 2, 3, 4-нд хийх Сөүл, Токиогийн тусгай үүргийн нислэгт Мэргэжлийн хяналтын хоёр байцаагч дагалдаж явна. Эмч хүмүүс учир зорчигчдын эрүүл мэндэд анхаарал тавьж, асуумж бөглүүлнэ. Энэ бол энгийн нэг нислэг биш гэдгийг сайтар санах хэрэгтэй гэдгийг анхаарууллаа. Тиймээс халдвар, хамгааллын дэглэмийг сайтар сахиулна.
Асуумж бичиг 20 асуулттай, үүний 14-т нь заавал хариулах ёстой. Иргэд асуумжаа буруу, дутуу бөглөж хариуцлагагүй хандсан тохиолдол өмнөх тусгай үүргийн нислэгүүдийн үеэр гарчээ. Ингэсэн тохиолдолд хуулийн хариуцлага хүлээх заалттайг дахин сануулж байгаа юм. Тусгай үүргийн онгоцоор ирсэн хүмүүс суудлын дугаараа буруу бичиж байгаа нь мөн ноцтой асуудал. Энэ нь хавьтал тодорхойлоход хүндрэл үүсгэж байгаа ажээ. Истанбулын нислэгээр ирж, халдвар авсан нь тогтоогдсон иргэн л гэхэд суудлын дугаараа буруу бичсэнээс болж хавьтал тодорхойлоход маш хүндрэл үүсчээ.
Түүнчлэн онгоцонд хоол өгөхгүй, бие засуулахгүй. Тиймээс зочид буудалдаа биеэ бэлдэхийг зөвлөж байгаа юм. Халуунтай хүнийг авахаа больчих вий гэдэг үүднээс иргэд онгоцонд суухынхаа өмнө халуун бууруулах эм ууж болохгүй. Халуурсан бол тусгаарлан эмчлэх байр руу очно, эрт арга хэмжээ авахуулна гэдгийг онцолж байгаа юм. Онгоцноос зорчигчдын нэрс дуудаж буулгана, нэг дор овоорч буухгүй. Тусгаарлан ажиглагдах хүмүүс урд хаалгаар, эмчлэн тусгаарлагдах хүмүүс хойд хаалгаар бууна гэдгийг мөн анхааруулав.
