ШУА 2017 онд Инновацийн тухай хуулийн хэрэгжилтийг хангахад Шинжлэх ухаан технологийн салбарын оролцоог идэвхжүүлэх, гарсан санаачилгыг дэмжих зорилгоор Инноваци, технологийн хэлтсийг байгуулжээ. Тус хэлтэс өнгөрсөн хугацаанд ШУА-ийн “Технологи дамжуулах журам”-ыг 2018 онд батлуулж, үйл ажиллагааг өргөтгөн, 2019 онд Инновацийн тухай хууль түүний дагалдах “Улсын төсвийн санхүүжилтээр гүйцэтгэсэн эрдэм шинжилгээ, туршилт, зохион бүтээх ажлын үр дүнд бий болсон оюуны өмчийг өмчлүүлэх, эзэмшүүлэх журам”-ын дагуу 12 оюуны өмчийн эзэмших эрхийн шилжүүлгийг Монгол Улсын Оюуны өмчийн газартай хамтран гүйцэтгэж, эрхийн зөрчлийг арилгасан байна.
Уг ажлын үр дүнд 2019 онд гурван лицензийн гэрээ байгуулан, патентын тухай хуулийн дагуу ОӨГ-т бүртгүүлжээ. Үүнээс Биологийн хүрээлэн хоёр лицензийн гэрээ, Хими, химийн технологийн хүрээлэн нэг лицензийн гэрээ байгуулсан аж.
Улмаар ШУА-ийн 2019 оны аж үйлдвэрийн оюуны өмчийг ашиглуулах лицензийн гэрээгээр 1,5 сая төгрөгийн орлого олсон байна. Ингэснээр ШУА-ийн судлаачдын эрдэм шинжилгээ, судалгаа, хөгжүүлэлтийн ажлын үр дүнд бий болсон оюуны өмчүүд эдийн засгийн эргэлтэд орж, судлаачид анхны роялти ашгаа хүртэж буй нь энэ юм.
