Монгол-Японы сургалтын эмнэлгийг БСШУСЯ-ны харьяанд шилжүүлжээ

Засгийн газрын өчигдрийн ээлжит хуралдаанаар АШУҮИС-ийн дэргэдэх Монгол-Японы эмнэлгийн асуудлыг хэлэлцжээ. Хуралдаанаар Монгол-Японы сургалтын эмнэлгийн үйл ажиллагааны санхүүжилт, техник тоног төхөөрөмжийн асуудлыг цогцоор нь шийдсэн байна. Уг эмнэлгийг хувьчлах гэж байгаа гэдэг таамаг олон нийтийн дунд бий болсон. Тэгвэл үүнд цэг тавьж өнгөрсөн жил ашиглалтад орсон энэхүү сургалтын эмнэлгийг БСШУСЯ-ны харьяанд шилжүүлэх шийдвэрийг Засгийн газрын хуралдаанаас гаргасан байна. Тиймээс уг эмнэлгийн үйл ажиллагаа цаашид хэвийн үргэлжлэхээр болж байгаа юм. Одоогийн байдлаар тус эмнэлгийн дүрс оношилгоо, дуран, амбулатори, уламжлалт анагаах ухааны лабораториуд ажиллаж байгаа. Бүрэн хүчин чадлаар нь ашиглах 14 тэрбумын асуудлыг Дэлхийн банк шийдсэн юм байна. Японы Засгийн газрын буцалтгүй тусламжаар баригдсан энэхүү сургалтын эмнэлэг нь Монгол Улс дахь дүрс оношилгооны хамгийн том тасагтайгаараа онцлог юм.