МЗЭ-ийн шагналт, МУСТА, яруу найрагч, Алтай нутгийн хүү Намбарын Пүрэв аав, ээжийнхээ 80 насны ойг угтан “Хувьхан заяаны харгуй минь” шилмэл бүтээлийнхээ цомгийг сонсогчиддоо хүргээд байна.
Тэрбээр Говь-Алтай аймгийн Дэлгэр сумын Гуулин тосгонд аав Р.Намбар, ээж Н.Цэрэн нарын есөн хүүгийн тав дахь нь болж мэндэлсэн. Гэргий Д.Чимгээ, том хүү П.ЗоригЗуунай, бага хүү П.ЗөөлөнЗаяа нартай амьдардаг бөгөөд Багш, эрх зүйч мэргэжилтэй.
1990-ээд оноос уран бүтээлээ эхлэн туурвиж “Дэлхий дүүрэн хайр” /1997он/, “Сэтгэлийн гэгээ” /2007он/, “Тэнгэрийн зарлигаар” /2010он/, “Сэтгэлээс шивэрсэн онгодын бороо” /2020он/ зэрэг яруу найргийн ном хэвлүүлсэн.
Нийтийн шилдэг дууны “Цэцгэнд төөрсөн эрвээхэй” /Хайрын цомог 2005он/, “Намбарын Пүрэвийн намуухан уянга” /Шилмэл цомог 2008он/, “Дэндүү буянтай буурлууд-Даанчиг хайртай аав ээж хоёр минь” /Хос цомог 2013 он/ тус тус гаргасан билээ.
Тэрбээр 2011 онд Монгол Улсын Соёлын Тэргүүний Ажилтан цол тэмдэг, 2014 онд Төрийн дээд шагнал “Алтан гадас” одон, 2019 онд Төрийн дээд шагнал “Хөдөлмөрийн Гавьяаны улаан тугийн одон” хүртэж төр, түмэн олондоо хөдөлмөр бүтээлээ үнэлүүлсэн юм.
Энэ удаагийн цомогт нь “Хурд” хамтлагийн дуулсан “Тоотой санагдах юм”, гавьяат жүжигчин Л.Болдбаатарын дуулсан “Хувьхан заяаны харгуй минь”, МУСТА Э.Төрмандахын дуулсан “Сайхан”, Х.Батмэндийн дуулсан “Ухаарлын намар”, Б.Болдбаатарын дуулсан “Нутгаа санаад уярдаг сэтгэл минь” зэрэг хит болсон 19 дуу багтжээ.
