Нээлтээ хийсэн цагаасаа хойш кино сонирхогчдын дунд нилээдгүй яригдаж буй ”Шимэгч” киногоор нь бид Бун Жун У найруулагчийг мэдэх болсон билээ. Өмнөд Солонгосын кино найруулагч тэрээр өөрийн бүтээлдээ бараан комеди маягийн өнгө аясыг ашигладагаараа онцлогтой. Бун Жун У нийтдээ 11 бүрэн хэмжээний кино зохиол бичиж, тэрнийхээ 7-г нь найруулсан юм. Түүний бүтээлүүд дундаас заавал үзэх хэрэгтэй 5 киног танд санал болгож байна.
- ”Шимэгч” (2019) /Parasite/
Кимийн гэр бүл баян айлд маш амархан ”орж” буйгаар кино эхэлнэ. Тансаг зэрэглэлийн сууцанд амьдардаг баян айл болох Паркын гэр бүл, хагас подвалд шахцалдан амьдардаг Кимийн гэр бүл хоёроор өнөөгийн нийгэм дэх баян, ядуугийн ялгаа, капитализмыг шүүмжлэхийг оролджээ.
2. Аллагын дурсамж (2003) /Memories of Murder/
Солонгосын нэгэн бөглүү тосгонд удаа дарааллан эмэгтэйчүүдийг хүчирхийлж, амийг нь бүрэлгэсэн хэрэг гарах болов. Алуурчин хэрэг үйлдэхдээ ямар ч баримт үл үлдээнэ. Мөрдөгч Парк, Сео нар гэмт хэрэгтэнг барихаар хамтдаа байж болох бүхий л талаар мөрдөх болно. Харин тэд чадах болов уу?
Энэ киног 1986-1991 оны хооронд Кёнги мужийн Хвасон хотод болсон Солонгосын түүхэн дэх анхны цуврал аллага гэгддэг бодит түүхээс сэдэвлэн бүтээсэн. Уг хэргээс хойш 30 орчим жилийн дараа буюу өнгөрсөн 2019 онд жинхэнэ хэрэгтнийг олж илрүүлсэн юм.
3. Цас ханзлагч (2013) /Snowpiercer/
Уг кино нь түүний бүтээлүүд дундаас гадаад хэл дээр бүтээгдсэн гэдгээрээ онцлог. Гол дүрүүдэд Крис Эванс, Тилда Свинтон, Сон Кан О нар тоглосон. Уур амьсгалын инженерчлэлийг ашиглан дэлхийн дулаарлыг зогсоох оролдлого 2014 онд шинэ мөсөн эрин үеийг бий болгосноор хүн төрөлхтний үлдэгдлүүд цаг ханзлагч галт тэргээр явахаас аргагүйд хүрнэ. 2031 он гэхэд галт тэрэгний зорчигчдыг нийгмийн ангиар нь ангилж, элитүүдийг дээд зэрэглэлийн эрд эгнээний тасалгаанд байрлуулж байхад ядуу хүмүүсийг зэвсэгт харуулуудын хүчээр хамгийн арын тасалгаанд албадан оруулна. Энэ кинондоо Бун Жун У мөн л ангийн ялгаварлал, тэгш бус байдлыг илэрхийлжээ.
4. Эх (2009) /Mother/
Эхийн сэтгэл гэдэг хэзээ ч дуусашгүй гэдэг. Аллагын хэрэгт буруутгагдан баривчлагдсан хүүгийнхээ төлөө эх хүн юу хийж чадахыг энэ киноноос үзээрэй.
5. Okja (2017)
Генийн өөрчлөлтөд орсон аварга том гахай ба Мижа охины тухай түүх. Хүчтэй, мөнгөтэй хүмүүст найзыгаа алдахгүйн тулд Мижа охин юу хийж чадах бол?
