Шинэ коронавирусийн халдвартай холбоотойгоор бүх шатны боловсрол, сургалтын байгууллагуудын үйл ажиллагааг гуравдугаар сарын 02-ныг хүртэл зогсоогоод байгаа. Энэхүү шийдвэрийн хэрэгжилтэд Нийслэлийн мэргэжлийн хяналтын газраас хяналт тавин ажиллаж байгаа юм байна.
Тухайлбал, Баянгол дүүргийн 16 дугаар хороонд байрлах “Алтан чадамж интернэйшнл” ХХК-ийн “Алтан чадамж” сургалтын төвийн үйл ажиллагаанд иргэний мэдээллийн дагуу төлөвлөгөөт бус хяналт шалгалт хийхэд тус сургалтын төв нь 10 суралцагчтайгаар сургалтын үйл ажиллагаа явуулж байсан зөрчлийг илрүүлж, зөрчил шалган шийдвэрлэх ажиллагаа явуулжээ. Уг зөрчилд Монгол Улсын Зөрчлийн тухай хуулийн холбогдох заалтын дагуу торгох шийтгэл ногдуулсан байна.
Сургалтын төвийн удирдлагад үйл ажиллагааг 2020 оны гуравдугаар сарын 02-ны өдрийг хүртэл түр зогсоох, багш нарыг удирдлага, зохион байгуулалтаар хангаж, дур мэдэн сургалт явуулахгүй байх нөхцөлийг бүрдүүлэх, зайлшгүй шаардлагатай тохиолдолд цахим хичээл явуулах талаар мэргэжил арга зүйгээр хангах арга хэмжээг авч хэрэгжүүлэх талаар улсын байцаагчийн албан даалгавар хүргүүлжээ.
Эх сурвалж: http://ub.inspection.gov.mn
