Спортын гэрэл зургийн сурвалжлагч Ч.Ганбат Олон улсын спортын сэтгүүлчдийн холбооны 2019 оны спортын агшин төрөлд шилдэг бүтээл нь шалгарч “Sport media awards”-ын хүрэл медаль хүртжээ. Түүний шагналыг өчигдөр буюу энэ сарын 03-нд Унгарын Будапешт хотноо болсон Олон улсын спортын сэтгүүлчдийн холбоо AIPS-ын конгрессын үеэр гардуулсан байна.
Олон улсын спортын сэтгүүлчдийн холбооноос “AIPS Sport Media Awards” уралдааныг хоёр дахь жилдээ зарласан бөгөөд энэ жил 125 орны 1746 бүтээлийг хүлээн авчээ. Эдгээр бүтээлүүдээс фото зургийн “Спортын үйл явдал” ангилалд шилдэг 30 зургийг шалгаруулсан бөгөөд үүнд Монголын спортын гэрэл зургийн сэтгүүлч Ч.Ганбатын “Before a catch!” бүтээл шалгарч үлдээд байсан юм.
