Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг дэмжиж Хэнтий аймаг 2030 он хүртэлх хугацаанд гучин сая мод тарьж ургуулах зорилго тавьсан.
Үүний хүрээнд Аймгийн Засаг дарга Д.Аюурбунь, “Тэрбум мод” үндэсний хөдөлгөөнийг дэмжих сангийн Гүйцэтгэх захирал Б.Баярмаа нар тус сангийн санхүүжилтээр Хэнтий аймгийн Батширээт сумын “Барх” багийн нутаг Гурван даваа гэх газарт нийт 200 га талбайд ойжуулалт, ойн нөхөн сэргээлтийн ажлыг гүйцэтгүүлж, хамтран ажиллахаар гүйцэтгэгч талуудтай гэрээ байгууллаа.
Тус гэрээгээр ойжуулалт, ойн нөхөн сэргээлт хийх ажлыг 100 га талбайд Хэнтий аймгийн “Батширээт” СДОА, “Хэнтий шинэс” СДОА, “Биндэр-Ой” СДОА-иуд гүйцэтгэх ба 100 га талбайд ойн мэргэжлийн байгууллага болох “Говийн улиас” ХХК гүйцэтгэж, тус бүр 250,000 ширхэг буюу нийт 500,000 ширхэг нарс модны тарьцаар ойжуулах тариалалтын ажил, арчлан хамгаалалт, нөхөн тарилтын ажлуудыг 2026-2029 он хүртэлх хугацаанд хийж хэрэгжүүлэх юм.
