Бэлчээрийн ургамлын ургалтын нөхцөл байдлын талаар 2026 оны дөрөвдүгээр сарын 20-ны байдлаар бэлчээрийн ургамлын ургалтын төлөв байдлыг дүгнэхэд нийт нутгийн 60 гаруй хувьд ургамал цухуйсан байна.
Бүс нутгаар авч үзвэл, Дундговь, Сүхбаатар аймгийн нийт нутаг, Говь-Алтай, Завхан аймгийн ихэнх, мөн Увс, Ховд, Баянхонгор, Архангай, Өвөрхангай, Төв, Өмнөговь аймгуудын зарим, Хэнтий аймгийн ганц нэг сумдын нутгаар бэлчээрийн ургамлын ургалт муу байна. Харин бусад нутгаар ургалт дунд зэрэг байгаа бөгөөд Дорнод аймгийн ихэнх нутгаар ургамлын ургалт сайн байна.
Өмнөх жилийн мөн үетэй харьцуулахад дулаан болон чийгийн дутагдлын улмаас зарим бүс нутагт ургамлын цухуйлт оройтож байгаа нь ажиглагдаж байна. Тухайлбал, нийт нутгийн ойролцоогоор 10 хувьд буюу Ховд, Хөвсгөл, Хэнтий, Дорноговь аймгийн ихэнх хэсгээр бэлчээрийн ургамлын цухуйлт оройтож байна.
Эх сурвалж: Хүнс, хөдөө аж ахуй, хөнгөн үйлдвэрийн яам
