УИХ дахь Ардчилсан намын бүлгийн дарга О.Цогтгэрэл Ерөнхий сайд Г.Занданшатарт албан шаардлага хүргүүлжээ. Уг шаардлагадаа Булган аймгийн Засаг дарга Д.Пүрэв-Очирыг албан тушаалаас нь чөлөөлж, хуулийн хэрэгжилтийг хангах ёстой гэж үзсэн байна.
Тодруулбал, О.Цогтгэрэл гишүүн албан шаардлагадаа дээрх үндэслэлээ тайлбарлахдаа, Д.Пүрэв-Очирыг 2024 оны 11-р сарын 13-ны өдөр Булган аймгийн Засаг даргаар томилсон нь “төрийн албанд гурваас доошгүй жил ажилласан байх ёстой” гэсэн хуулийн шаардлагад нийцээгүй гэж үзжээ. Учир нь Д.Пүрэв-Очир нь 2018 оны 12-р сарын 21-ний өдөр Нисэх буудлуудын удирдах газрын төлөвлөлт хариуцсан ерөнхий менежерээр ажилд орж, 2022 оны дөрөвдүгээр сарын 25-ны өдөр Иргэний нисэхийн үндэсний төвийн нисэх буудлуудын үйлчилгээний газрын менежерийн ажлаас чөлөөлөгдсөн аж. Түүний хашсан дээрх ажил, албан тушаал нь Төрийн албаны тухай хуульд заасан төрийн албаны аль ч ангилалд хамаарахгүй юм байна. Өөрөөр хэлбэл, П.Пүрэв-Очир нь аймгийн Засаг даргаар томилогдохоосоо өмнө нэг ч өдөр төрийн жинхэнэ албанд ажиллаагүй гэсэн үг.
Ташрамд дурдахад Д.Пүрэв-Очирыг хангалтгүй ажилласан гэж Булган аймгийн ИТХ дүгнэсэн гэдэг мэдээлэл олон нийтэд түгээд буй.
