Монгол Улсын Тэргүүн шадар сайд бөгөөд Эдийн засаг, хөгжлийн сайд Н.Учрал УИХ-ын даргын албан тушаалд томилогдсон тул Засгийн газрын бүрэлдэхүүнд өөрчлөлт хөдөлгөөн орох нь тодорхой болоод буй. Ерөнхий сайд Г.Занданшатар УИХ дахь МАН-ын бүлгийн өнөөдрийн хуралдаанд ХХААХҮ-ийн сайд Ж.Энхбаярыг Тэргүүн шадар сайд бөгөөд Эдийн засаг, хөгжлийн сайдад, түүний оронд ХХААХҮ-ийн сайдад УИХ-ын гишүүн М.Бадамсүрэнг томилох саналаа танилцуулсныг бүлгийн гишүүд дэмжжээ.
Засгийн газрын тэргүүн Үндсэн хуулиар олгогдсон бүрэн эрхийнхээ хүрээнд дээрх томилгоонуудыг хийх бөгөөд УИХ-д танилцуулснаар сайд нар тангараг өргөж, ажлаа хүлээж авах юм.
