“Үндэстний тойм” сэтгүүлийн тоймч, сэтгүүлч, Хэнтий аймгийн Батноров сумын уугуул О.Эрдэнэчимэгийн “Монголын нууц товчоо – 2000 асуулт хариулт” номын нээлт Эзэн Чингис хааны мэндэлсний 863 жилийн ой, Монгол бахархлын өдөр Хэнтий аймгийн Чингис хотноо боллоо. Энэхүү ном нь “Монголын нууц товчоо”-г маш ойлгомжтой хэлбэрээр, асуулт, хариулт байдлаар түүхэн газар нутаг, хүний нэрсийг орхигдуулалгүйгээр оруулснаараа онцлог юм. Энэхүү номдоо Оюуны өмчийн газраас гэрчилгээ авсан бөгөөд “Монголын нууц товчоо”-ны талаарх мэдлэгийг энгийн хэлбэрээр олон нийтэд таниулахад чухал ач холбогдолтой бүтээл болжээ. Эх түүхээ сонирхон судлагч хүн бүхэнд уншихад дөхөм бөгөөд ахлах ангийн сурагчид түүхийн олимпиадад бэлдэхэд энэхүү ном гарын авлага болох юм.
“Монголын нууц товчоо -2000 асуулт, хариулт” номыг 20000 төгрөгөөр “Аз хур”, “Интерном” номын дэлгүүрүүдээр худалдаалж байна.
