Зам, тээврийн яаманд өнөөдөр (2025.06.09) Монгол, Хятадын “Гашуунсухайт-Ганцмод боомтын хил дамнасан төмөр замын бүтээн байгуулалтын ажил гүйцэтгэх гэрээ”-нд гарын үсэг зурах ёслол болжээ. Ёслолын арга хэмжээнд Монгол Улсын Засгийн газрын гишүүн, Зам, тээврийн сайд Б.Дэлгэрсайхан, Зам, тээврийн яамны Төмөрзам, далайн тээвэр бодлого зохицуулалтын газрын дарга Х.Итгэлт, “Тавантолгой төмөр зам” ХХК-ийн Гүйцэтгэх захирал Б.Дүгэржав болон холбогдох албаныхан оролцсон байна.
БНХАУ-ын талаас Монгол Улсад суугаа Элчин сайд Шэнь Минжуан, БНХАУ-аас Монгол Улсад суугаа Элчин сайдын яамны Эдийн засаг, худалдааны албаны зөвлөх Лю Жинжи, БНХАУ-аас Монгол Улсад суугаа Элчин сайдын яамны Эдийн засаг, худалдааны албаны нарийн бичгийн дарга Цао Юэ, Хятадын төмөр замын барилгын гүүр инженеринг групп ХХК-ийн дэд ерөнхий менежер Ли Гуочян, Хятадын Төмөр замын барилгын гүүр инженеринг групп Интернэшнл ХХК-ийн ерөнхий менежер Шие Шяочэ нар оролцжээ.
Гашуунсухайт-Ганцмод боомтын хил дамнасан төмөр замын төслийн барилгын ажлын гүйцэтгэгчийг сонгон шалгаруулах ажлыг Төрийн худалдан авах ажиллагааны газар дээр холбогдох хууль тогтоомжийн хүрээнд зохион байгуулж, түүний үр дүнд төмөр замын барилга, гүүрийн угсралтын чиглэлээр БНХАУ-ын дэлхийд нэр хүндтэй барилгын гүйцэтгэгч гэгддэг 2 компани оролцсоноос “Хятадын төмөр замын барилгын корпораци “СИ АР СИ СИ” (CRCC) шалгарч, түүний охин компани болох “Хятадын төмөр замын барилгын гүүрний инженерийн товчоо групп” бүтээн байгуулалтын ажлыг хийж гүйцэтгэхээр сонгогдоод байна.
Ийнхүү Гашуунсухайт-Ганцмод боомтын хил дамнасан төмөр замын бүтээн байгуулалтыг хамтдаа бодитоор эхлүүлэхээр “Тавантолгой төмөр зам” ХХК болон “Хятадын төмөр замын барилгын гүүрийн инженерийн товчоо групп” ХХК-иуд барилгын ажил гүйцэтгэх гэрээний төслийг эцэслэн тохирч гарын үсэг зурж баталгаажууллаа.
Гашуунсухайт-Гнацмодны боомтын төмөр зам бол Л.Оюун-Эрдэнийн Засгийн газраас санаачлан эхлүүлсэн 14 мега төслийн нэг юм. Ерөнхий сайд Л.Оюун-Эрдэнэ өнгөрсөн оны арваннэгдүгээр сард БНХАУ-д айлчлах үеэрээ 16 жил гацсан Гашуунсухайт-Ганцмодны боомын төмөр замыг Монголын тал өргөн, Хятадын тал нарийн царигаараа холбох тохиролцоонд хүрсэн юм. Энэхүү хил холболтын төмөр замыг барьж ашиглалтад оруулсны дараа Ханги-Мандал, Шивээхүрэнгийн боомтыг холбоход бэлэн байгаагаа БНХАУ-ын тал мэдэгдсэн юм.
