АТГ-ын дэргэдэх Олон нийтийн зөвлөл “Эрдэнэс Тавантолгой” ХК-ийн үйл ажиллагаатай танилцжээ. Тус зөвлөл нь авлигын эсрэг хуулийн 27.1 дэх хэсэгт заасны дагуу “авлигатай тэмцэхэд олон нийтийг идэвхтэй оролцуулах, тэдний санал бодлыг хүргэх авлигын нөхцөл байдал, авлигын эсрэг хууль тогтоомжийн хэрэгжилтийн талаар зөвлөмж өгөх”, Авлигатай тэмцэх газрын дэргэдэх олон нийтийн зөвлөлийн ажиллах журмын дагуу “төрийн байгууллага болон төрийн өмчийн оролцоотой аж ахуйн нэгжид Авлигатай тэмцэх газраас өгсөн зөвлөмжийн, хэрэгжүүлж буй арга хэмжээ, тэдгээрийн үр дүнтэй танилцах” зэрэг чиг үүрэгтэй юм.
Тус зөвлөлийн гишүүдэд “Эрдэнэс Тавантолгой” ХК-ийн бүтэц зохион байгуулалт, ажилтны сонгон шалгаруулалт, худалдан авалтын үйл ажиллагаа, борлуулалт, орлого, дотоод хяналт, мониторингийн ажлын үр дүн, зөвлөмж, Авлига, ашиг сонирхлын зөрчлөөс урьдчилан сэргийлэх үйл ажиллагааны талаар танилцуулсан байна.
“Эрдэнэс Тавантолгой” ХК үйл ажиллагаандаа Олон улсын ISO 37001 Авлигын эсрэг менежментийн тогтолцооны стандартыг Монгол улсад анхлан нэвтрүүлэн хэрэгжүүлэн ажилладаг талаар тус стандартын хэрэгжилт, үр дүнгийн дэлгэрэнгүй мэдээлэл өгсөн бөгөөд тус зөвлөлийн гишүүд асуулт асууж хариулт авчээ.
