Сүмогийн их аварга Хакүхо М.Даваажаргалын нэрэмжит цомын төлөөх хүүхдийн барилдаан ирэх оны хоёрдугаар сард 15 дахь удаагаа зохион байгуулагдахаар болжээ. Өнгөрсөн хавар түүний удирддаг дэвжээны монгол сүмоч Хокүсэйхо А.Даваанинж бусад бөхчүүдээ дарамталж, зоддог байсан нь илэрч, Сүмогийн холбооны зүгээс Хакүхо М.Даваажаргал буюу Мияагино оякатаг дэвжээгээ удирдаж чадахгүй байгаа гэж дэвжээ удирдах эрхийг нь хураасан юм.
Энэ дуулианы дараа уламжлалт Хакүхогийн цомын төлөөх барилдаан болохгүй болов уу гэсэн таамаг сүмогийн ертөнцийнхөнд байжээ. Өсвөрийн сүмогийн хуанлид тэмдэглэгдсэн хамгийн том, нэр хүндтэй тэмцээн учир Хакүхогийн цомыг зохион байгуулахаар болсон аж.
