Монгол Улсад төмөр замын салбар үүсэж хөгжсөний 86 жил, “Улаанбаатар төмөр зам” ХНН байгуулагдсаны түүхт 75 жилийн ойн баярын хурал “Corporate Convention Centre” дэх хурлын танхимд ёслол төгөлдөр болж байна.
Баярын хуралд Монгол Улсын Ерөнхийлөгч Ухнаагийн Хүрэлсүх, Монгол Улсын Засгийн газрын гишүүн, Зам тээврийн сайд Борхүүгийн Дэлгэрсайхан, “Улаанбаатар төмөр зам” ХНН-ийн дарга Х.Хэрлэн болон Оросын Нээлттэй хувьцаат нийгэмлэгийн ерөнхий захирлын нэгдүгээр орлогч бөгөөд “УБТЗ” ХНН-ийн Ерөнхий хорооны дарга С.А Павлов, БНХАУ-ын Төмөр замын төв корпорацийн Ерөнхий инженерийн орлогч Жу Гоу Жиан, БНСУ-ын “Солонгосын төмөр замын корпорац” (KORAIL)-ийн Ерөнхийлөгч, Олон Улсын Төмөр замуудын холбооны Ази номхон далайн ерөнхий ассамблейн ерөнхийлөгч Хан Мү Хи, Казахстаны төмөр зам үндэсний корпорацийн Үйлдвэрлэлийн үйл явц хариуцсан захирал Урынбасаров Бауыржан Пазылбекович, Транс-Евроазийн Тээвэрлэлтийг зохицуулах зөвлөлийн дарга Ганчаров Михайл Юрьевич, “Оросын төмөр замууд” нийгэмлэгийн Ерөнхий захирлын орлогч бөгөөд Дорнод Сибирийн төмөр замын дарга Фролов Василий Фёдорович, Өвөр Байгалийн төмөр замын дарга Антонец Владимир Александрович, ОХУ-ын төмөр замын агентлаг Росжелдорын орлогч дарга БАтюк Алексадр Сергеевич, Якутын төмөр замын гүйцэтгэх захирал Кондратов Дмитрий Викторович, ОХУ-ын Эрхүү мужийн амбан захирагчийн орлогч Колесов Раман Андреевич, БНСУ-ын Дунян их сургуулийн ерөнхийлөгч Чой Сан Хае, Бээжингийн Зам харилцааны их сургуулийн олон улсын боловсролын их сургуулийн захирал Яо Энь Жиан, Эрхүүгийн Зам харилцааны улсын их сургуулийн ректор Трофимов Юрий Анатольевич нар болон гадны бусад хүндэт зочид төлөөлөгчид, үе үеийн ган замчид хүрэлцэн ирсэн байна.
Түүх сөхвөл, Монгол-Оросын хувь нийлүүлсэн “Улаанбаатар төмөр зам” нийгэмлэг нь тэртээх 1949 онд Бүгд Найрамдах Монгол Ард Улс, Зөвлөлт Холбоот Улсын Засгийн газар хоорондын гэрээ хэлэлцээрээр байгуулагдаж байсан түүхтэй. Өдгөө “Улаанбаатар төмөр зам” хэмээх өнөр гэр бүл 16 мянган ажилчин алба хаагчидтай, Монгол Улсын нийгэм эдийн засгийн эргэлтийг сайжруулахад голлох үүргийг гүйцэтгэж буй, хөгжлийг түүчээлсэн зүтгүүр байгууллагын нэг болон хөгжиж байгаа билээ.
Тиймээс түүхт ойгоо тэмдэглэж, амжилт бүтээлээ дүгнэж цэгнэж буй энэ өдрүүдэд Монгол Улсын Ерөнхийлөгч Ухнаагийн Хүрэлсүх зарлиг гарган улс орны хөгжил дэвшил, их бүтээн байгуулалт болон Ази-Европыг холбосон тээвэр, ложистикийн сүлжээнд оруулж буй онцгой хувь нэмрийг нь үнэлж, “УБТЗ” ХНН-ийг Монгол Улсын “Хөдөлмөрийн баатар” цолоор шагнасан нь баяр дээр бас дахин баяр нэмсэн онцгой үйл явдал боллоо.
Монгол Улсын Ерөнхийлөгч У. Хүрэлсүх төмөр замын салбар, тус байгууллагын үе үеийн Монгол, Орос хоёр орны удирдлага, хамт олон, ажилтан, албан хаагчид, төмөр замчдад төр, ард түмний нэрийн өмнөөс баяр хүргэж, талархал илэрхийлж, мэндчилгээ дэвшүүлсэн юм.
Мэндчилгээнд “Монгол Улс нь Ази-Европыг холбосон бүс нутгийн тээврийн томоохон тоглогч болж, Монгол, Орос, Хятадын эдийн засгийн коридорыг бүтээн байгуулж, “Транзит Монгол Улс” болох зорилтыг дэвшүүлсэн. Энэ хүрээнд ОХУ-ын “Их Евразийн түншлэл”, БНХАУ-ын “Бүс ба зам” санаачилга, Монгол Улсын “Талын зам” үндэсний хөтөлбөрийг харилцан уялдаа холбоотой хэрэгжүүлэхэд “УБТЗ” ХНН онцгой чухал үүрэг гүйцэтгэх учиртай”-г онцолж, цаашдын амжилт бүтээл нь улам өрнүүн дэлгэр байхыг билэгдэв.
