Японы мэргэжлийн сүмогийн дээд зиндаанд маэгашира цолтой барилдаж буй монгол сүмоч Хокүсэйхо А.Даваанинж дэвжээний бөхчүүдээ зодож, дарамталдаг нь илэрчээ. Тиймээс А.Даваанинжийг зодог тайлуулах, дэвжээнийх нь багш Миягино ояката буюу Хакүхо М.Даваажаргалын зэрэг дэвийг хоёр шатаар бууруулах шийтгэл ногдуулахаар болсон байна.
Хокүсэйхо А.Даваанинж дэвжээний бөхчүүдтэйгээ зүй бусаар харьцдаг тухай мэдээ хов жив маягаар нэлээд олон өдрийн өмнө Японы сайтуудаар тархсан гэнэ. Гэвч үүнийг батлах албаны эх сурвалж байхгүй байжээ. Харин Сүмогийн холбооны Дагаж мөрдөх хороо хоёрдугаар сарын 21-нд Кокүгикан ордонд хуралдаж, Хокүсэйхогийн асуудлыг шийджээ. Тэрбээр залуу бөхчүүдийн эсрэг хүчирхийлэл үйлдсэн гэм буруутай нь тогтоогдсон тул албан ёсоор зодог тайлуулах зөвлөмж гаргажээ. Үүнийг маргааш буюу хоёрдугаар сарын 23-нд болох Сүмогийн холбооны удирдлагуудын ээлжит бус хурлаар эцэслэн шийднэ. Энэ санал батлагдвал Хокүсэйхо банзүкэгээс хасагдаж, зодог тайлна. Мияагино ояката буюу Хакүхогийн хувьд оякатагаас хоёр зэрэг бууруулна. Энэ нь ердийнхөөс хамаагүй бага цалин авна гэсэн үг. Мөн тэрбээр Сүмогийн холбооны хамгийн доод зэрэглэлийн гишүүн болох юм байна.
Хокүсейхо А.Даваанинж сэтгүүлчдэд хандан “Би хийсэн үйлдэлдээ чин сэтгэлээсээ харамсаж байна” гэж мэдэгджээ. Зарим эх сурвалжийн мэдээлснээр Мияагино ояката энэ талаар байр сууриа илэрхийлэхдээ Хокүсэйхогийн хүчирхийллийг мэдээгүй гэсэн бөгөөд түүнийг зодог тайлуулахыг хүлээн зөвшөөрч байгаа аж.
