ГССҮТ-ийн салбар эмнэлгийн Эрчимт эмчилгээний тасагт 80-95 хувийн түлэгдэлтэй, биеийн байдал маш хүнд оноштойгоор хэвтэн эмчлүүлж байгаа үйлчлүүлэгчдээс дахин нэг хүн нас баржээ. Ингэснээр галын ослоос үүдэлтэй түлэгдэж, гэмтсэн хоёр хүн эмнэлгийн тусламж үйлчилгээ авах явцдаа нас барсан тохиолдол боллоо. Уг ослоос үүдэн нийт 14 хүн тусламж үйлчилгээ авснаас дөрвөн иргэнд анхан шатны тусламж үйлчилгээ үзүүлж, харъяа дүүргийн эрүүл мэндийн байгууллагын хяналтанд шилжүүлсэн байна.
Улмаар тус салбар эмнэлгийн Түлэгдлийн төвийн тасагт биеийн байдал дунд буюу тогтвортой байгаа дөрөв, Эрчимт эмчилгээний тасагт биеийн байдал хүнд болон маш хүнд оноштой зургаан хүн хэвтэн эмчлүүлж байсан юм. Өдгөө тус Эрчимт эмчилгээний тасагт биеийн байдал хүнд дөрвөн хүн байгаагаас биеийн байдал маш хүнд оноштой нэг хүн байна.
