АНУ-ын Калифорни мужийн Лос Анжелес хотноо 2023 оны арваннэгдүгээр сарын 12-ноос 17-ны хооронд Олон улсын шог зураачдын (International Society of Caricature Artists) З2 дахь чуулган зохиогджээ. Энэ үеэр хэн шог зураг хурдан зурах вэ тэмцээн болж дэлхийн өнцөг булан бүрээс 250 гаруй зураач ирж оролцсон байна. Энэхүү тэмцээнд Монголын зураач, яруу найрагч Л.Мөнхтөр түрүүлж, “World’s Fastest Caricature Artist” буюу Дэлхийн хамгийн хурдан шог зураач цом гарджээ. Тэмцээнд оролцогчид 30 минутад мэргэжлийн шаардлага хангасан 12 зураг зурах даалгавартайгаас Л.Мөнхтөр нийт 44 зураг зуран 1-р байрт шалгарчээ.
Дэлхийн хамгийн хурдан шог зураач тэмцээн уг хотын “Sheraton Gateway” зочид буудалд болсон байна. Мөн тэрбээр “Outstanding 3D Тechnique” буюу хошин хөрөг баримлын ангилалд 3-р байр эзэлсэн байна. Өмнө нь тэрбээр 2014 онд Охайёо мужийн Сандаски хотод болсон уг ангиллын тэмцээнд 2-р байрт шалгарч байсан аж. 2006 оноос өнөөг хүртэл Америк дахь монголчуудын дунд соёл урлаг, утга зохиол, олон нийтийн арга хэмжээг хамтран зохион байгуулж ирсэн агаад зураач, яруу найрагч Л.Мөнхтөр энэ жил уран бүтээлийн олз омог ихтэй байна. Тэрбээр эсээ, дурсамж, өгүүллэгийн “Тэрс өнцөг”, яруу найраг, дууны “Дэлхий нэвт” хос номоо гаргаж уншигчдын хүртээл болгосон аж. Хошин хөрөг бол дүр урлал, комикс, анимэйшн, хүүхэлдэйн киноны үндэс болдог маш чухал, урлагийн өвөрмөц төрөл. Дараа дараагийн наадмуудад зураачдаа тогтмол оролцуулах тал дээр Монголын шог зураачдын холбоо санаачилгатай байх, мөн Соёлын яам зураачдаа дэмжиж ажиллахыг тэрбээр хүссэн юм.
