Японы мэргэжлийн сүмогийн кюүшюү башё өнөөдөр өндөрлөлөө. Дээд зиндаанд озэки Киришима Б.Лхагвасүрэн 13 даваа, хоёр унаатайгаар түрүүллээ. 15 дахь өдөр тэрээр озэки Такакэйшог цүкиотоши мэхээр өвдөг шороодуулснаар ийнхүү эзэн хааны цомыг гардлаа. Киришима Б.Лхагвасүрэнгийн хувьд ийнхүү энэ жилийн зургаан башёгийн хоёрт нь түрүүлж байна. Тэрбээр өнөөдөр Японы эзэн хааны цом гардсан нь монголчуудын макүүчи зиндаанд хүртсэн 100 дахь түрүү болжээ.
Хоошорюү С.Бямбасүрэн башёгийн сүүлийн өдөр сэкивакэ Дайэшог давснаар 10 даваа, таван унаатай тэмцээнийг өндөрлүүлөв. Хокүсэйхо А.Даваанинж учраадаа өвдөн шороодсоноор 50-иас дээш хувийн амжилтаа үзүүлж чадалгүй накикоше болж байна. Ирэх оны нэгдүгээр сарын башёд тэрбээр зиндаа буурах нь тодорхой болов. Тамаваши Б.Мөнх-Оргил өнөөдөр мөн учраадаа унаснаар есөн даваа, зургаан унаатайгаар тэмцээнийг дуусгалаа.
