Японы мэргэжлийн сүмогийн арваннэгдүгээр сарын тэмцээн кюүшюү башё маргааш өндөрлөнө. Их аварга Тэрүнофүжи Г.Ган-Эрдэнэ барилдалгүй өнжсөн энэ удаагийн башёг озэки цолтнууд тэргүүлэн барилдсанаас Монголын хоёр озэки гялалзсан амжилт үзүүллээ. Озэки Киришима Б.Лхагвасүрэн 14 өдрийн дараах байдлаар 12 даваа, хоёр унаатайгаар ганцаараа башёг хошуучилж байна. Түүний араас 11 даваа, гурван унаатай маэгашира Атамифүжи, 10 даваа, дөрвөн унаатай сэкивакэ Котоновака, маэгашира Ичияамомато нар нэхэж байна. Тиймээс Киришима озэки маргааш учраа таарсан озэки Такакэйшог давах юм бол шууд түрүүлнэ. Харин өвдөг шороодвол Атамифүжитэй нэмэлт барилдаан хийх нөхцөл үүснэ. Атамифүжи сэкивакэ Котоновакатай маргааш барилдах юм.
Озэки Хоошорюү С.Бямбасүрэн 14 өдрийн дараах байдлаар есөн даваа, таван унаатай болоод байна. Тэрбээр маргааш сэкивакэ Дайэшотой оноолт таарчээ. Хокүсэйхо А.Даваанинж даваа унаа тэнцүү болсон бөгөөд маргааш давж байж 50-иас дээш хувийн амжилт үзүүлэх боломжтой. Энэ сард маэгаширагийн 12 руу унасан Тамаваши Б.Мөнх-Оргил есөн даваа, таван унаатай 50-иас дээш хувийн амжилтаа үзүүлж, дараагийн башёд маэгаширагийн дээд хэсэгт эргэн ирэх нь тодорхой болжээ.
