Авлигатай тэмцэх газраас өнөөдөр сэтгүүлчдэд мэдээлэл хийлээ. АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн “Ногоон автобусны худалдан авалттай холбогдуулж, УИХ-ын гишүүн, сайд асан Ж.Сүхбаатарыг эрүүгийн хэрэгт яллагдагчаар татах саналыг мөрдөгчөөс прокурорт хүргүүлсэн. Албан тушаалын байдлаа урвуулан ашиглаж, бусдад давуу байдал үүсгэсэн үндэслэлээр буруутгаж байгаа. Харин Улаанбаатар хотын захирагч асан Д.Сумъяабазарыг хараахан яллагдагчаар татах санал гаргаагүй байна” гэлээ.
Мөн нүүрсний хэрэгтэй холбоотойгоор УИХ-ын гишүүн асан Д.Бат-Эрдэнэ, УИХ-ын гишүүн А.Адъяасүрэн нартай холбоотой мөрдөн байцаалтын ажиллагаа дууссан. Хэргийн холбогдогч нарт хэргийн материалыг танилцуулах ажиллагаа явж буй юм байна. УИХ-ын гишүүн Н.Наранбаатарт холбогдох хэргийн мөрдөн шалгах ажиллагаа үргэлжилж байгаа аж.
АТГ 2013 онд 43 хэргийг шүүхэд шилжүүлж байсан бол 2023 онд 270 хэргийг илрүүлж, шүүхэд шилжүүлсэн. Гэмт хэргийн илрүүлэлт 6.3 дахин өссөн. Учирсан хохирлыг нөхөн төлүүлэх арга хэмжэээ авч ажиллаж байна. 2013 онд 6.3 тэрбум төгрөгийг нөхөн төлүүлж байсан бол 2023 оны арваннэгдүгээр сарын байдлаар 194.8 тэрбум төгрөгийг нөхөн төлүүлсэн. Үл хөдлөх хөрөнгө буюу байр, орон сууц, хөдлөх хөрөнгө буюу машин, тоног төхөөрөмж зэрэг нийт 11.2 тэрбум төгрөгийн хөрөнгийг битүүмжлэн хамгаалах арга хэмжээг авсан байна.
Энэ талаар комиссар Н.Тэмүүлэн “Хулгайлагдсан хөрөнгө гадаадад байгааг тогтоож, буцаан авч ирэх ажиллагааг явуулж байна. Тухайлбал, Их Британи, Умард Ирландын нэгдсэн хаант улсаас орон сууц бусад эд хөрөнгийг шилжүүлэн эргүүлэн авч ирсэн. Виржини арал дахь оффшор бүсэд хууль бусаар байршуулсан мөнгө угаах гэмт хэрэг үйлдсэн хүнээс 2.2 тэрбум төгрөг буюу 1.6 сая ам.доллар бүхий газар, үл хөдлөх хөрөнгийг эргүүлэн авч ирсэн. Вени арлаас 5.7 сая ам.доллартай дүйх хөрөнгө мөнгийг буцаан авсан. Латви улсад байх этгээдийн 548.3 мянган ам доллар дансанд нь байгааг битүүмжилж, эрх зүйн харилцан туслалцаагаар мөрдөн шалгах ажиллагаа явуулж, энэ бүх хөрөнгөө буцаан авч ирэх ажиллагаа явж байна.
Хэрэг хянан шийдвэрлэх хугацаанд гадаад улс руу оргон зайлсан сэжигтэн, яллагчдагч 34 иргэн байсан. Одоогоор 12 этгээдийг Монгол Улсад авчраад байна. Үлдсэн 22 этгээдийн нэгийг харьяаллын дагуу шилжүүлж, хоёр этгээдэд холбогдох хэрэг бүртгэлтийн хэрэг хаагдсан учраас цаашид олон улсад эрэн сурвалжлах шаардлагагүй болсон. Үлдсэн 19 этгээдийг хаана байгааг олж тогтоох, эргүүлэн авчрах ажлыг тасралтгүй үргэлжлүүлж байгаа.
“Шувуу” ажиллагааны хүрээнд Унгар улсаас нэг, Серби улсаас нэг, Польш улсаас нэг, Филиппин улсаас нэг, Хятад улсаас хоёр, Австрали улсаас нэг, Турк улсаас нэг иргэнийг нийт 12 иргэнийг илрүүлж, Монголд авч ирсэн.
Үлдсэн 19 этгээдийг эрэн сурвалжилж оршин суугаа газрыг тогтоох, эрх зүйн харилцан туслалцаа хүсэн ажиллаж байна. Гадаад улс руу оргон зайлсан этгээдүүдийн байгаа газрыг олж тогтоон, буцаан авч ирэх ажиллагаа амар биш, хүндрэлтэй тулж байгаа.
Тухайлбал, хэргийн ажиллагаанаас оргон зайлсан этгээд Монголоос Турк руу олон улсын нислэгээр нисээд цаашаа Нидерланд улс руу гараад тэндээс Вьетнам руу ирж байгаа дүр зураг харагдаж байгаа. Вьетнамаасаа буцаад Австри улс орж, Грек рүү онгоцоор зорчоод, цаашаа Нидерландад очоод, улмаар АНУ ын Калфорни мужийн Лос Анжелос хот хүрч тэндээсээ Орланда руу явж байгаа. Үлдсэн 19 этгээдийг хаана байгааг эцсийн байдлаар олж тогтоох, буцаан авч ирэх чиглэлээр ажиллаж байна” гэлээ.
Гэмт хэргийн замаар олсон мөнгийг нуун далдлах зорилгоор үл хөдлөх хөрөнгө бий болгодог тул битүүмжлэн хамгаалж байгаа аж. Тухайлбал, авлига, гэмт хэргийн замаар олсон мөнгөө нуух зорилгоор нэг хотхонд 22 орон сууц худалдан авсан байсныг илрүүлж, захиран зарцуулах эрхийг хязгаарласан байна. АТГ-аас нуугдмал гэмт хэргийг илрүүлэх чиглэлээр анхаарч ажиллаж байна. Тус газраас 2023 оны эхний хагас жилд нийт шалгасан хэргийн 270 буюу 15 хувийг шүүхэд шилжүүлэх саналтайгаар прокурорын байгууллагад шилжүүлсэн. Одоо 102 хэрэгт мөрдөн байцаалт явуулж байгаа аж.
