Японы мэргэжлийн сүмогийн есдүгээр сарын башёд дээд зиндаа макүүчигийн дээд хэсгийн өндөр цолтой бөхчүүд тааруухан барилдаж байна. Их аварга Тэрүнофүжи Г.Ган-Эрдэнэ бэртлийн улмаас өнжсөн тул энэ удаагийн башёг озэки цолтнууд ахалж буй. Монголын хоёр озэки нараас Киришима Б.Лхагвасүрэн зургаан даваа, дөрвөн унаатай, Хоошорюү С.Бямбасүрэн дөрвөн даваа, зургаан унаатай явна. Харин озэки Такакейшо долоон даваа, гурван унаатай тэмцээнийг үргэлжлүүлж байна. Монгол бөхчүүдээс маэгаширагийн баруун жигүүрийн гурваас босож барилдаж буй Тамаваши Б.Мөнх-Оргил арван өдөр дараалан өвдөг шороодоод байна.
Мэргэжлийн сүмогийн дээрээсээ гурав дахь зиндаа макүшитад Дархан аварга Д.Цэрэнтогтохын зээ хүү, Улсын гарьд Д.Рагчаагийн хүү Асахакүрюу Р.Жамъянтогтох ганц ч унаагүйгээр тав даван тэргүүлж явна. Тэрбээр өнгөрсөн долдугаар сард мөн нэг ч өвдөг шороодоогүй боловч нэмэлт барилдаанаар өвдөг шороодон зиндаандаа түрүүлж чадаагүй юм. Энэ сард мөн үлдсэн хоёр барилдаанд давж гэмээнэ түрүүлэх боломжтой. Тэрбээр их аварга Асашёорюүгийн харьяалагдаж асан “Такасаго” дэвжээний бөх юм. Асашёорюү аварга түүнийг сүмод хөл тавихад нь нөлөөлсөн аж. Р.Жамъянтогтох макүшитад түрүүлбэл жюүрёо зиндаанд дэвшин, сэкитори болох юм.
