Монголын рокийн амьд домог “Чингис хаан” хамтлаг энэ сарын 16-нд Төв цэнгэлдэх хүрээлэнд тоглолтоо хийх гэж байна.
“Чингис хаан” хамтлаг нь 1989 оноос эхлэн уран бүтээлийн гараагаа эхэлсэн юм. Хамтлагийн гаргасан “Хаалгыг минь тогшооч, Эрхүүгийн хавар” цомгууд нь Монголд хамгийн олон жилийн турш их эрэлттэй, өндөр үнэтэй борлогдсон цомгоор тодорч байлаа. 2007 онд зохион байгуулагдсан “Монголын Алтан дуу” наадмаас “ Төрсөн өдрийн дуу, 18 нас минь бүү орхиоч” гэсэн дуу нь “Алтан дуу” шагнал авчээ.
2007 онд “UB Palace”-ийн танхимд “The best of Chinggis khaan” тоглолтоо хийснээс хойш томоохон бүрэн хэмжээний тоглолт хийгээгүй байсан тус хамтлаг ийнхүү энэ намар гал гарсан тоглолтоо хийхээр бэлтгэлдээ ханцуй шамлан орсноо дуулгалаа. Тоглолтын нэр “XXI зуун”. XX зуунд бүтээж, түмний сэтгэлд хоногшсон дуунуудыг XXI зуун тоглолт үзэгч, сонсогчиддоо хүргэнэ. Тоглолтод “Чингис хаан” хамтлагийн шилдэг 35 дуу эгшиглэх бөгөөд урилгаар “Зууны манлай”, МУГЖ Б.Сарантуяа, МУГЖ Т.Ариунаа, МУГЖ Ж.Алтанцэцэг, дуучин С.Сэрчмаа, С.Наран нарын поп дива нар, дуучин Хишигдалай, Зоригт болон “Соёл-Эрдэнэ”, “Өргөө”, “Хар сарнай” хамтлаг, “Niciton”, GUYS, “Киви”, “Сүнс” хамтлагийнхан ая дуугаа өргөх юм байна. Тасалбарыг ticket.mn сайт болон 19001950 дугаараар хүргүүлэн авч болно. Мөн “Нарантуул”, “Хархорин”, Зайсангийн Танктай хөшөө, “Хүчит шонхор” зах гэх мэт олны хөлийн газарт тасалбар борлуулна, тоглолт болох өдөр Төв цэнгэлдэхийн гадна ч тасалбар борлуулах цэг ажиллуулна гэдгээ зохион байгуулагчид дурдлаа. Тасалбар 59 мянган төгрөгийн үнэтэй бөгөөд “early bird” буюу эртэч шувуухай тасалбарыг 39 мянган төгрөгөөр есдүгээр сарын 12-ны 12 цаг хүртэл худалдаж авах боломжтой ажээ. Мөн “Чингис хаан” хамтлагийн пэйж хуудсаар тоглолтын бэлтгэлийн тухай мэдээлэл өгөх LIVE орой бүр явах юм байна.
Зохион байгуулагчдын хэлснээр “Рокийн сүр хүчийг харуулах” “XXI ЗУУН” тоглолтын бэлтгэл ажлын талаар тодруулга авлаа.
–Тоглолтын бэлтгэл хэр байгаа вэ. Хөтөлбөрийн талаар дэлгэрүүлж мэдээлэл өгөөч. “Чингис хаан” хамтлаг сүүлийн жилүүдэд томоохон тоглолт хийгээгүй, бэлтгэлээ хэзээнээс хангаж эхэлсэн бэ?
МУАЖ Д.Жаргалсайхан:
-Манай хамтлаг томоохон тоглолт хийгээгүй ч байнгын бэлтгэлтэй байгаа. Энэ жил гэхэд дөрөв, таван аймгийн 100 жилийн ойн тоглолтод оролцсон. Мөн өнгөрсөн жил улс орноо бүтэн тойрч 21 аймагтаа тоглолтоо хийсэн. 21 аймаг тойрч тоглолт хийнэ гэдэг чанга ажил. Тоглолтын тов эхлээд зарлагдсан байсан учир бид дунд нь нэг хоног ч саатах амрах, өвдөх эрхгүйгээр ажиллаж байж 21 аймгийн тоглолынхоо ард гарсан. Ер нь өөрсдийн тоглолтоо хийгээгүй ч байнгын бэлтгэлтэй, шинэ уран бүтээлээ туурвисаар байгаа. “XXI зуун” тоглолтын тухайд манай хамтлаг үе үеийн хит 35 дуугаа дуулна. Яг ямар 35 дуу дуулахаа тодруулах гэдэг ярвигтай асуудал болоод байна.
Манай хамтлагийн онцлог гэх үү дээ өмнө нь тоглолтуудаа ягшсан хөтөлбөр гаргалгүйгээр “Нүдэн охин” дуугаа дуулж эхлээд тухайн сонсогчдынхоо уур амьсгалыг харж мэдэрч байгаад дараа дараагийн дуугаа би өөрөө сонгоод явчихдаг, нэг бодлын эрх чөлөөтэй, хөгжимчид маань ч гэнэтийн энэ зүйлдээ бэлтгэлтэй байдаг байлаа. Энэ удаад стадионы хэмжээний том тоглолт хийх учир ямар ч байсан урьдчилаад 35 дуугаа сонгож батална. Тоглолтын маань найруулагч шинэ дуу дуулахыг дэмжихгүй гэж хэлсэн. Тэгэхэээр хүмүүсийн хамгийн сайн мэддэг, хамгийн сэтгэлд нь хоногшсон дуунуудаасаа сонгож тоглолтдоо дуулна даа.
Олон улсад Монголын түүхийн нэртэй олон хамтлаг байдаг. Гэхдээ Монголын түүхийг монголчуудаас илүү дуулна гэдэгт би итгэдэггүй. Чингис хаан” хамтлаг үзэгч сонсогчидтойгоо тоглолтоороо эргэн уулзаж байгаад баяртай байна.
–Тоглолт хэдэн цаг үргэлжлэх вэ. Тусгай хэрэгцээт хүмүүст зориулсан бүс ч юм уу гаргах уу?
On&OFF продакшн С.Ононбат:
-Тоглолт 17:00 цагт эхэлнэ, 16:00 цагт стадион үүдээ нээж хүмүүсээ оруулж эхэлнэ. “Чингис хаан” хамтлаг маань 20:00 цагт тоглолтоо эхлүүлнэ гэж тооцож байгаа. Үүнээс өмнө зочин уран бүтээлчид ая дуугаа өргөх бөгөөд Төв цэнгэлдэхэд уух зүйлс болон хоолны 10-аад асар ажиллана. Гаднаас уух зүйлс оруулахгүй. Сонсогчид маань тав тухтай тоглолтоо үзэх үүднээс зөөврийн сандалаа авч ирээд сууж үзэж болно. Жаргалсайхан ах бид хоёр хамтарч том тоглолт зохион байгуулах талаар олон жил ярьсан нь одоо биеллээ олох гэж байна. “XXI зуун” тоглолт дурсамж сэдрээсэн, үе үеийн сайхан дуунууд эгшиглэсэн тоглолт болно.
Тусгай хэрэгцээт хүмүүст зориулсан хэсэг гаргах талаар төлөвлөж ажиллаж байгаа. Жагаа ахын зохиосон ч өөрөө дуулаагүй, хүмүүсийн маш сайн мэдддэг хоёр дууг Жагаа ах энэ тоглолтын үеэр дуулна. Яг ямар дуу гэдгийг тоглолтоо үзээд мэдээрэй.
Тоглолтын талаарх мэдээллийг 1900-1950, 8583-6464 гэсэн дугаараас мэдээлэл авна. Тасалбарыг http://Ticket.mn болон 1900-1950 дугаараас захиалан үнэгүй хүргүүлэх боломжтой. Мөн цахим орчноос тасалбар авах боломжгүй иргэд тасалбар худалдаалах цэгүүдийг байгуулжээ.
