Пакистаны өмнөд нутгийн Синд мужид өчигдөр буюу наймдугаар сарын 6-ны үдэд зорчигч тээврийн галт тэрэг замаасаа гарч осолдсоны улмаас 22 хүн нас барж, 50 хүн шархадлаа гэж тус мужийн албан тушаалтан мэдэгдсэн байна.
Ослын талбайн аврах ажиллагаа хариуцсан цагдаагийн офицер “Синьхуа” агентлагийн сурвалжлагчид хэлэхдээ, 10 вагонтой хурдны галт тэрэг тухайн нутгийн Серхари буудлаас хөдлөөд удалгүй замаасаа гарч осолдсон. Пакистаны арми, цагдаа, авран туслагчид ослын газарт очиж тусалж байна. Цөөнгүй зорчигч вагон дотор болон вагоны дор байгаа. Бэртсэн хүмүүсийг эмнэлэгт хүргэсэн бөгөөд зарим хүмүүсийн биеийн байдал маш хүнд байгаа тул нас барагсдын тоо цаашид нэмэгдэж болзошгүй гэжээ.
Энэ галт тэрэг мөн өдрийн үдэд Синд мужийн Карачи хотоос хөдөлж баруун хойд нутгийн Хайбер-Пахтунхва мужийг зорьж явсан юм байна. Ослын хэргийг мөрдөн шалгаж эхэлсэн гэж эх сурвалж мэдээлжээ.
