Шинэ зууны анхны даншиг наадам буюу 2015 оны даншиг наадмын үндэсний бөхийн барилдаанаас эхлэн бөхчүүдийг төрийн наадмын цол харгалзахгүйгээр сугалаагаар барилдуулдаг жишиг тогтсон. Монголын Бурхан шашинтны төв Гандантэгчэнлин хийдийн тэргүүн Хамбын шийдвэрээр, түрүүлсэн бөхөд Даншигийн арслан, үзүүрлэсэн бөхөд Даншигийн заан, зургаа давсан бөхөд чимэгтэй Даншгийн начин, тав давсан бөхөд Даншигийн начин цолыг тус тус олгож, үнэмлэх, тэмдгийг гардуулах шийдвэр гарсан. Гэхдээ энэхүү цол нь зөвхөн “Даншиг-Хүрээ цам” наадамд л хүчин төгөлдөр үйлчлэхээр тогтоосон билээ.
Энэ жилийн даншиг наадмын хүчит бөхийн барилдааны талаар Монгол бөхийн холбооны тэргүүн Ц.Магалжавын мэдээлснээр “Даншиг наадам-Хүрээ цам 2023”-ын бөхийн барилдааныг Монголын үндэсний бөхийн холбоотой хамтран зохион байгуулна. Энэ удаад үндэсний бөхийн 256 хүчит бөх, Өвөрмонгол, Буриадын 64 бөх зодоглоно. Барилдааныг уламжлал ёсоор сугалаагаар зохион байгуулна. Орон нутагт 3-4 наадам давхцаж байгаа ч зодоглох бөхийн тоо хангалттай. Одоогоор ӨМӨЗО-оос 19 бөх хүрэлцэн ирээд буй аж. Бай шагналын хувьд бусад наадмаас өндөр, мөн Даншигийн цол олгоно.
