Монгол Улсын Ерөнхий сайд Л.Оюун-Эрдэнэ АНУ-д албан ёсны айлчлал хийж байна. Ерөнхий сайдын айлчлалын хүрээнд хийсэн хэлэлцээр, шийдвэрүүд олны анхаарлыг татаж буй. Тухайлбал, Ерөнхий сайд Л.Оюун-Эрдэнэ АНУ-ын Дэд Ерөнхийлөгч Камала Харристай Цагаан ордонд уулзан албан ёсны хэлэлцээ хийхийнхээ өмнө Монгол, Америкийн Стратегийн түншлэлийн өнөөгийн байдал, харилцаа, хамтын ажиллагааны тэргүүлэх чиглэлийн талаар хоёр орны Засгийн газрын түвшинд анх удаа мэдэгдэл хийсэн.
Ерөнхий сайд Л.Оюун-Эрдэнийн АНУ-д хийж буй айлчлалын талаар олон улсын харилцааны судлаач, эрдэмтэн Д.Баярхүү хэвлэлд байр сууриа илэрхийлжээ. Тэрбээр,
-Аливаа гадаад айлчлал дандаа эрэлхийлэл байж ирсэн. Монгол Улсын олон улсын нэр хүнд хангалттай сайн байна. Монголыг зорьж ирэх гадаадын өндөр дээд төлөөлөгчдийн айлчлал тогтмолжиж байна. Айлчлалууд хоёр урсгалтай болсон. Манай улс энхийг эрхэмлэсэн, олон тулгуурт, идэвхтэй, онолын хувьд прагматик гадаад бодлого явуулж чадаж байна. Гадаад бодлого хоёр ба гуравдагч хөршийн хооронд тэнцвэрийг зөв барьж чадаж байна. Түүний нэг илэрхийлэл бол энэ айлчлал болно. Дэлхийн тэргүүлэх глобал гүрэнд уригдаад айлчлан очиж байгаа нь өөрөө улс төрийн өндөр ач холбогдолтой үйл явдал юм. Монгол Улсын олон улсын нэр хүнд хэр байгаагийн шалгуур үзүүлэлт болно. Тэр дундаа дэлхийн тэргүүлэх өрнөдийн гүрнүүд, тэдний өрнөд ертөнцөд Монгол гэдэг энэ жижиг улс хэр хүндлэгдэж байгаагийн ил тод илэрхийлэл. Олон улсын хэмжээний үйл явдал гэж үзэн хүндэтгэлтэй хандах хэрэгтэй. Гадаад айлчлал болгон энэ улсын хөгжил дэвшил, шилжилтийн амаргүй цаг үеийн бэрхшээлийг гэтэлгэх шинэ түнш, шинэ хамтрагч, шинэ хөрөнгө оруулалт, худалдааны шинэ эргэлтийн төлөөх эрэлхийлэл байдаг хэмээсэн байна. /Эх сурвалж “Монголын үнэн” сонин/
