“Шинэ мянган” утга зохиолын нэгдэл, БНСУ-ын Дорнын утга зохиолын академи хооронд хамтын ажиллагааны гэрээ байгуулах ёслол боллоо. Гэрээнд “Шинэ мянган” утга зохиолын нэгдлийн гүйцэтгэх захирал, МЗЭ-ийн шагналт яруу найрагч Б.Чулуунцэцэг, БНСУ-ын Дорнын утга зохиолын академийн ерөнхийлөгч, зохиолч Ким Ханъчан нар гарын үсэг зурав. Уг гэрээ нь хоёр байгууллагын хооронд байгуулж буй хоёр дахь удаагийн гэрээ юм байна. Анх 2012 онд Улаанбаатарын их сургуулийн багш, яруу найрагч, доктор Тойсомын Галсан, Ким Ханъчан нарын санаачилга, идэвх зүтгэлээр хоёр орны зохиолч, яруу найрагчдын хамтын ажиллагааг эхлүүлж байжээ. Өнгөрсөн 10 жилийн хугацаанд хоёр тал Монгол, Солонгос улсад ээлжлэн уран зохиолын семинар зохион байгуулах, ном товхимол хэвлэх зэрэг олон ажлыг тогтмол хийж иржээ. Хоёр дахь удаагийн хамтын ажиллагааны гэрээний хүрээнд монгол, солонгос уран зохиолын солилцоог идэвхжүүлэх, орчуулагчдын ур чадварыг сайжруулах чиглэлээр тодорхой ажлууд хийхээр тохиролцсон байна.
