“Нийслэлийн үнэт цаас гаргах тухай” тогтоолын төслийг Засгийн газрын хуралдаанаар хэлэлцэж баталжээ. Улаанбаатар хотын төвлөрлийг сааруулж, түгжрэлийг бууруулах, авто зам, замын байгууламжийн сүлжээг өргөтгөх, бүтээн байгуулалтын төсөл, арга хэмжээг санхүүжүүлэх зорилгоор Нийслэлийн Засаг даргын Тамгын газрын зүгээс 500 тэрбум төгрөг хүртэлх хэмжээний үнэт цаасыг дотоодын зах зээлд үе шаттайгаар арилжаалахыг хэлэлцэн дэмжсэн байна. Үнэт цаасны эх үүсвэрээр хэрэгжүүлэх төсөл хөтөлбөрүүдийг Нийслэлийн төсөвт тусгаж, Засгийн газрын хуралдаанд танилцуулахыг нийслэлийн Засаг дарга бөгөөд Улаанбаатар хотын Захирагч Д.Сумъяабазарт даалгажээ.
Улаанбаатар хотын эрх зүйн байдлын тухай хуулийн шинэчилсэн найруулгын 13.1-д “Нийслэл хуульд заасан нөхцөл, журмын дагуу үнэт цаас гаргаж болно” гэж заасны дагуу Засаг даргын захирамжаар өнгөрсөн тавдугаар сард ажлын хэсэг байгуулсан. Тус ажлын хэсэг Өрийн удирдлагын тухай хуульд заасны дагуу Сангийн яамтай хамтран, холбогдох байгууллагаас санал авч, Засгийн газрын хуралдаанаар Нийслэл үнэт цаас гаргах, арилжаалах, мэдээлэх журмыг батлуулсан байна. Энэ асуудлыг НИТХ-аар хэлэлцүүлэн, Сангийн яаманд саналаа хүргүүлж, дүгнэлт гаргуулжээ.
Өрийн удирдлагын тухай хуулийн дагуу үнэт цаасыг арилжаалах замаар татан төвлөрүүлсэн эх үүсвэрийг дараах шаардлага хангасан төсөл, үйл ажиллагаанд санхүүжүүлэх зохицуулалттай. Тодруулбал, төсөвт тусгасан, дунд хугацааны төсвийн хүрээний мэдэгдэлд нийцсэн, хөгжлийн бодлого, төлөвлөлтийн баримт бичигт тусгасан, мөн тухайн төсөл, үйл ажиллагааны төрлөөс хамааран зураг төсөв, техник, эдийн засгийн үндэслэлийг хийж баталгаажуулсан байх юм.
