Хүн дааганаас унаж үхдэггүй, дарвагараасаа унаж үхдэг гэж үг бий. Тийм явдал Шилэн Цогоод тохиолджээ. Мань эр Боловсролын зээлийн сангийн мэдээллийг ил болгосны дараа УИХ-ын гишүүн, сайд асан Ц.Оюунгэрэлийн төрсөн дүү Ц.Баттай жиргээн дээр дайн зарлаж, цахим орчинд цадиггүй хэрүүл зарга хийсээр байгаа юм. Ингэхдээ Л.Халтар сайдын талаар худал ташаа мэдээлэл тараажээ. Ам алдвал барьж болдоггүй гэдэг үг Шилэн Цогоогийн хувьд шилэн хүзүүн дундуур нь ширүүхэн дэлссэнээс ч хүчтэй цохилт болжээ. Жиргээ шургааны явган хэрүүл, явуургүй сэвээндээ өрөөл бусдыг хавчуулсан нь ийнхүү өөдөө хаясан чулуу өөрийн толгой дээр гэгч болсон байна. Жиргээнийхэн ч түүнийг худал, баримтгүй зүйл бичдэгийг нь ёжлон жиг жуг хийцгээжээ. Тиймээс Шилэн Цогоо хэмээх Б.Цоггэрэл Зам, тээврийн хөгжлийн дэд сайд Л.Халтараас уучлал гуйжээ. Нэгэн цагт төрийн яаманд дэд сайдаар хүртэл ажиллаж явсан хүн ийнхүү хамар дор хагархай байна гэгчээр хаа хамаагүй бурж байж Шилэн хочоо ширэн болгох вий дээ.
