УИХ-ын нэгдсэн чуулганы өнөөдрийн хуралдаанаар УИХ-ын гурван гишүүний бүрэн эрхийг түдгэлзүүлэх эсэх асуудлыг хаалттай хэлэлцсэн. Н.Наранбаатарыг авч үлдэн Д.Бат-Эрдэнэ, Т.Аюурсайхан хоёрын бүрэн эрхийг түдгэлзүүлэхээр УИХ шийджээ. УИХ-ын чуулганд 65 гишүүн оролцож, саналаа нууцаар өгсөн байна. Ерөнхий сайд Л.Оюун-Эрдэнэ чуулганы хуралдаанд оролцож, Улсын ерөнхий прокуророос оруулж ирсэн саналыг дэмжихийг гишүүдэд уриалсан байна.
Улсын ерөнхий прокуророос Т.Аюурсайхан гишүүнийг үндэслэлгүй хөрөнгөжих, зохион байгуулалттай бүлэг байгуулсан гэсэн үндэслэлээр бүрэн эрхийг нь түдгэлзүүлж, шалгахаар санал оруулаад байгаа юм. Т.Аюурсайхан гишүүнийг шалгах явцад 11 хүнтэй уулзахыг хязгаарлаж, нэг хүнийг яллагдагчаар татаж, нийт 119 хүнийг гэрчээр дуудсан байна. Харин УИХ-ын гишүүн Д.Бат-Эрдэнийг мөнгө угаах, хөрөнгө завших, эрх мэдэл, албан тушаалын байдлаа урвуулан ашиглах гэдэг дөрвөн зүйлээр яллагдагчаар татжээ. Уг хэрэгт холбогдуулан 66 хүнийг гэрчээр дуудаж, 11 хүнийг яллагдагчаар татсан байна. Тэгвэл УИХ-ын гишүүн Н.Наранбаатарыг үндэслэлгүй хөрөнгөжих, эрх мэдэл, албан тушаалаа урвуулан ашигласан гэж үзэн яллагдагчаар татжээ. Н.Наранбаатар гишүүний 16 эд хөрөнгийг битүүмжилж, 60 хүнийг гэрчээр дуудан асуусан байна.
