Хөгжлийн банкны гурав дахь удаагийн буюу сүүлийн нотлох баримтыг шинжлэн судлах сонсгол ирэх долоо хоногт болно. Энэ удаагийн сонсголоор нэгдүгээрт, арилжааны банкуудаар дамжуулан олгосон Хөгжлийн банкны эх үүсвэртэй нийт 1.6 их наяд төгрөгийн өртөгтэй, 2542 зээлийн асуудлыг ярина. Хоердугаарт, 2011-2020 он хүртэлх хугацаанд арилжааны банкуудад Хөгжлийн Банкны эх үүсвэрээс байршуулсан нийт 3280 мөнгөн хадгаламжийн хэлэлцэлд дүн шинжилгээ хийх юм байна.
Хөгжлийн банкны гурав дахь удаагийн сонсголд нийт 210 хүн, албан тушаалтныг гэрчээр дуудна. Тодруулбал, Ерөнхийлөгч асан Х.Баттулга, Сангийн сайд асан С.Баярцогт, Ч.Хүрэлбаатар, “MCS” группийн үүсгэн байгуулагч Ж.Оджаргал, “Таванбогд” группийн үүсгэн байгуулагч Ц.Баатарсайхан, “Буян” компанийн үүсгэн байгуулагч Б.Жаргалсайхан, УИХ-ын гишүүн асан Ж.Батзандан, Л.Эрдэнчимэг, Н.Батбаяр болон түүний охин Б.Жаргалан, УИХ-ын гишүүн О.Цогтгэрэл, Ш.Адьшаа нарын 210 хүнийг гэрчээр дуудахаар болжээ.Улсын банкнаас бага хүүтэй мөнгө авч цааш нь зээл нэрээр дамалдаг, мөн хүүгүй шахам мөнгө авч эргэлдүүлдэг арилжааны томоохон банкууд, улс төрчид, нөлөө бүхий эрхмүүдтэй хүзүү сээрээрээ хэлхэлдсэн банкны эздийн “маапаан” энэ сонсголоор сөхөгдөж гарна гэдэгт олон хүн итгэлтэй байна.
