Гэрэл зурагчид Ричард Уайт XIX-XX зууны алдартай зохиолчдын хар цагаан гэрэл зургийг өнгөт болгон засжээ. Ийнхүү засахад асар урт хугацаа шаардсан бөгөөд уйгагүй, нягт нямбай ажиллагааны үр дүнд олны танил, хайртай зохиолчдын хөрөг зургууд өнгөт хувилбараар “мэндэлжээ”.
Гүн Лев Толстой бол Оросын зохиолч бөгөөд бүх цаг үеийн хамгийн агуу зохиолчдын нэг гэж тооцогддог. Тэрээр 1828 оны есдүгээр сарын 9-нд төрж, 1910 оны арваннэгдүгээр сарын 7-нд 82 насандаа таалал төгссөн бөгөөд “Дайн ба энх”, “Иван Ильичийн үхэл”, “Анна Каренина” зэрэг зохиолуудаараа алдартай.
Жюль Верн бол “Дэлхийн төв рүү аялсан нь”, “Далайн доорх хорин мянган лиг”, “Наян өдөрт дэлхийг тойрон” зэрэг шинжлэх ухааны зөгнөлт, адал явдалт романаараа алдартай Францын зохиолч юм. Түүний номууд дэлхий даяар 100 сая гаруй хувь борлогдсон нь түүнийг хамгийн их борлуулалттай зохиолчдын нэг болгосон. Тэрээр 1828 оны 2-р сарын 8-нд Францын Нант хотод төрж, 1905 оны 3-р сарын 24-нд 77 насандаа Францын Амьен хотод таалал төгсчээ.
Марк Твейн хоч нэрээрээ алдаршсан Самуэл Лангхорн Клеменс бол бүх цаг үеийн Америкийн хамгийн агуу зохиолчдын нэг гэж тооцогддог. Тэрээр 1835 оны 11-р сарын 30-нд Миссурид төрж, 1910 оны 4-р сарын 21-нд Коннектикут мужид нас барсан. Түүний хамгийн алдартай бүтээлүүд нь Том Сойерын адал явдал, Хаклберри Финнийн адал явдал юм.
Жеймс Жойс бол Ирландын зохиолч, яруу найрагч бөгөөд 1882 оны 2-р сарын 2-нд төрж, 1941 оны 1-р сарын 13-нд 58 насандаа Швейцарьт таалал төгссөн. Тэрээр “Улисс”, “Уран бүтээлчийн залуу үеийн хөрөг” романаараа алдартай.
Уолт Уитман 1819 оны 5-р сарын 31-нд Нью-Йоркт төрж, 1892 оны 3-р сарын 26-нд 72 насандаа Нью Жерсид таалал төгссөн Америкийн яруу найрагч бөгөөд “Өвсний навч” шүлгийн түүвэр нь алдартай.
Эдгар Аллан По нь Америкийн зохиолч, яруу найрагч бөгөөд 1809 оны нэгдүгээр сарын 19-нд Массачусетс мужид төрж, 1849 оны аравдугаар сарын 7-нд Мэрилэнд мужид 40 насандаа таалал төгсчээ. Тэрээр “Хэрээ”, “Аннабел Ли”, “Амонтильядогийн торх”, “Үлгэр зүрх” зэрэг шүлэг, богино өгүүллэгээрээ алдартай.
