Ерөнхийлөгч асан Ц.Элбэгдоржийн бичсэн нийтлэл “The Diplomat” сэтгүүлд хэвлэгджээ. Тэрбээр энэ тухайгаа “Украинаас гадна Монголоо бичихийг бас хичээв. Гитлер халдан довтлоход монголчууд Зөвлөлтийн ард түмэнд яаж тусалсныг дурдлаа. Тэр жил Путинд энэ тухай ярихад -Монголчууд ямар их тусалсан юм бэ! Өөрөөс чинь анх удаа л сонсож байна гэж ирээд сэтгэл нь их хөдөлж билээ” гэжээ. Ерөнхийлөгч асан Ц.Элбэгдорж Украины Львов хотын Цэрэг, Улс төрийн Их сургуулийг сэтгүүлч мэргэжлээр төгссөн юм.
Тэрбээр “Яагаад Ази болон дэлхий дахин Украинтай хамт байх ёстой вэ?” гэсэн гарчигтай уг нийтлэлдээ “Украин дахин сүр жавхлантай байх болно. Украины шархадсан толгод руу амьдрал буцаж ирнэ. Эвдэрсэн орон сууц, гудамж талбайг сэргээнэ. Салсан гэр бүл, хайртай хүмүүс нэгдмэл байх болно. Украин эрх чөлөө, энх тайвныг дэлхийн бусад улстай хамт тэмдэглэх болно. Нэгдмэл, бүрэн эв нэгдэлтэй байна гэдэгт би маш их итгэдэг. Би эрх чөлөөний хүчинд бат итгэлтэй байдаг. Эрх чөлөөтэй байхаар шийдсэн хүмүүсийн хүсэл зоригийн эсрэг ямар ч эрх мэдэл, дарангуйлагч зогсож чадахгүй. Ард түмний дуу хоолой, тэдний шийдэмгий байдал ямар ч буун дуунаас хамаагүй хүчтэй. Эрх чөлөө нь аюул эрсдэлтэй тулгарсан үед тохиролцох боломжгүй юм” гэжээ.
Мөн “Владимир Путин эрх чөлөөг тэвчихгүй гэдгийг би мэднэ. Би түүнтэй олон удаа уулзаж байсан. Тэрбээр ялгаа, өрсөлдөөнийг үл тоомсорлодог. Тэрбээр эрх чөлөөтэй Украинаас айж байна. Гүн нарциссист хүний хувьд тэрбээр илүү амжилттай, цэцэглэн хөгжсөн хөршүүдийг тэвчиж чадахгүй. Тэрбээр эрх чөлөөтэй, иргэнлэг Украин түүний дэглэмд ноцтой аюул учруулж болзошгүй гэж төсөөлж байна” гэсэн байна.
Ц.Элбэгдорж нийтлэлдээ цааш нь бичихдээ, Украинд хийсэн Оросын түрэмгийлэл гэнэтийн зүйл биш юм. Энэ бол эрх чөлөөний үзэл санаа, нударга нударганы хоорондох урт удаан тэмцлийн оргил үе байв. Энэ дайны хэмжээ нь Украйны газар зүйн хил хязгаараас хамаагүй өргөн, урт, гүн гүнзгий юм. Галын фронт нь Африк, Ази, Америк, Ойрхи Дорнод даяар үргэлжилж байна. Энэ дайн эрх чөлөөт ертөнц ба дарлагдсан хүмүүсийн хооронд, автократ ба ардчиллын хооронд өрнөж байна хэмээн онцолжээ. Тэрбээр нийтлэлдээ цааш нь ийн бичжээ.
“Зарим ажиглагчид Азийн орнууд, тэр дундаа Монголын Украины эсрэг дайны талаарх байр суурьт сэтгэл дундуур байна. Орос, Хятад хоёрын дунд шахагдсан газар зүйн байршлаасаа болоод Монгол Улсын Засгийн газар тэнцвэржүүлэх арга хэмжээ авахаас өөр аргагүйд хүрч байна. Гэвч тусгаар тогтносон Украины эсрэг хэрцгийгээр дайрч байгааг Монголын олон нийтийн санаа бодол эрс эсэргүүцэж байна. Үүнтэй холбогдуулан нэгэн түүхэн жишээг дэлхий дахинд сануулмаар байна. Нацистуудын удирдагч Адольф Гитлер Зөвлөлт Холбоот Улс руу довтлоход Монголын ард түмэн энэ фашист түрэмгийлэгчийн эсрэг нэгдэж байсан. Тэд Зөвлөлтийн ард түмэнтэй эв санааны нэгдлээ илэрхийлж байсан. Нүүдэлчин малчид малынхаа талаас илүү хувийг ЗХУ руу илгээдэг байв. Дэлхийн 2-р дайны үед фронтод байсан нийт адууны дөрөвний нэг нь Монголоос ирсэн агт морьд байсан юм. Дайн дууссаны дараах өдрүүдэд Берлиний балгас дээр ялагч холбоотны цэргүүдтэй хамт туранхай ч чийрэг монгол морьд зогсож байхыг харах онцгой сэтгэгдэл төрүүлж байсан юм. Хүнд хэцүү нөхцөлд монгол адуу заримдаа цорын ганц тээврийн хэрэгсэл, заримдаа нэн шаардлагатай тэжээлийн эх үүсвэр байсан. Монголын малчид хагас сая гаруй адууг Зөвлөлтөд нийлүүлсэн. 1941 оны сүүлээр Зөвлөлтүүд Москвагийн захад Германы хүчний эсрэг сөрөг довтолгоо хийж эхлэв. Өвлийн ер бусын ширүүн тэр саруудад Улаан армийн ихэнх цэрэг, офицерууд Монголын малчдын хийсэн өвлийн дулаан хувцас өмсдөг байв. Түүнчлэн Монголын хандиваар Зөвлөлтүүд танкийн бригад, сөнөөгч онгоцны флотыг үйлдвэрлэжээ. Монгол Улсын Засгийн газар алт, мөнгөн тэмдэгтийн нөөцөө дөрвөн жил дараалан ЗХУ-д хандивласан. Нацист Герман ЗХУ руу довтлоход монголчууд хойд хөрштэйгээ чадах чинээгээрээ зогсож байсан. Путины Орос Украин руу довтлоход Монголын ард түмэн эхний өдрөөсөө л харгис түрэмгийллийн эсрэг зогссон”.
