ОБЕГ-ын дэд дарга, бригадын генерал Б.Ууганбаяраар ахлуулсан Эрэн хайх, аврах баг “Буянт-Ухаа” олон улсын нисэх буудлаас өглөөний 04:34 цагт Турк улс руу хөлгийн жолоо заллаа. Монгол Улсын Засгийн газраас гаргасан шийдвэрийн дагуу ОБЕГ-ын харьяа Үндэсний аврах бригад, Жанжин штабын 35 алба хаагч энэхүү багт багтсан бөгөөд эрэн хайх, аврах болон эрүүл мэндийн тусламж үйлчилгээ үзүүлэх юм. БНТУ-аас дэлхийн орнуудыг эрүүл мэндийн тусламж, эрэн хайх аврах ажиллагаа, хүнс болон хувцас хэрэглэлээр хангах хүмүүнлэгийн урилгыг гаргасан. Энэ дагуу Засгийн газраас 1500 ноосон хөнжил, 10 тонн махан нөөш, 2 тонн лаа бусад хүмүүнлэгийн тусламжийг илгээж байна.
БНТУ-ыг зорьж байгаа Монгол Улсын аврагчдын багт ОБЕГ-ын Эрэлч нохойн албаны Марта, Балу дуудлагатай ноход багтжээ. Эдгээр ноход нь эрэн хайхад бүрэн сургагдсан, “Марта” нь төрийн цэргийн болон хүчний байгууллагуудын үнэрч нохдын уралдаанд 2019 онд тэргүүлж байсан юм байна.
Өнө эртний түүх, соёлын шижмээр холбогдсон найрсаг харилцаат Туркийн ард түмэнд гамшиг зовлон тохиолдсон энэ үед Монголын төр, засаг, ард түмэн ийнхүү халуун гараа сунган, тусламж, дэмжлэг үзүүлж, мөн эрэн хайх, аврах ажиллагаанд шилдэг багаа илгээлээ.
