АНУ-ын уран сайхны гимнастикч Суниса Ли пүрэв гарагт Токиогийн олимпоос эмэгтэйчүүдийн ганцаарчилсан төрөлд алтан медаль хүртсэний дараа түүний төрсөн нутаг Сэйнт Паул хотын дарга Мелвин Картер, Миннесота мужийн амбан захирагч Уолс нар долдугаар сарын 30-ны баасан гарагийг “Суниса Лигийн өдөр” болгон зарлажээ.
Амбан захирагч Валз “Миннесота мужийн тамирчин Суниса Ли зуны олимпын наадамд түрүүлж АНУ-ын домогт тамирчдын дунд нэрээ мөнхөлж байгаад манай муж даяар бахархаж байна” гэжээ. Харин хотын дарга Уолс “Бид чамаар бахархаж байна, Суни. Алтан медалиа зүүгээд гэртээ хурдан ирээрэй” гэсэн байна.
Миннесота мужийн Сэйнт Паул хотын уугуул, АНУ-ын уран гимнастикч Суниса Ли 2003 оны гуравдугаар сарын 9-нд төржээ. Тэрбээр хмонг-америкчууд буюу 1970-аад онд Лаосаас цагаачилж ирсэн америкчуудын үр удам дундаас төрсөн анхны уран гимнастикч юм байна. Сүүлийн 12 жилийн турш Суниса гимнастикаар хичээллэж гайхалтай ур чадвар, авьяас, тууштай зан чанараараа богино хугацаанд амжилтад хүрчээ.
Тэрбээр 2019 оны дэлхийн аваргаас алтан медаль хүртсэн бөгөөд АНУ-ын эмэгтэй гимнастикийн шигшээ багийн 6 удаагийн гишүүн юм байна. Ли зургаан настай байхдаа Миннесота мужийн Литтл Канад дахь гимнастикийн төвд гимнастикаар хичээллэж эхэлсэн байна. Харин эдүгээ тэрбээр төрөлх Сэйнт Паул хотдоо бэлтгэлээ хийдэг аж.
