ЭМЯ-наас цар тахлын нөхцөл байдлын талаар ээлжит мэдээллээ хүргэлээ. Өнгөрсөн 24 цагийн хугацаанд улсын хэмжээнд нийт коронавирусийн халдварын 602 тохиолдол шинээр бүртгэгдсэн байна.Үүний 514 нь Улаанбаатар хотод, 88 нь хөдөө орон нутагт илэрчээ. Ийнхүү улсын хэмжээнд коронавирусийн халдвар авсан хүний тоо 10282 болсон байна. Коронавирусийн улмаас биеийн байдал нь маш хүнд байсан 60 настай эрэгтэй өчигдөр нас баржээ. Дотоодод халдвар тархсанаас хойш 12 хүн нас барсан байна.
Өнгөрсөн 24 цагийн хугацаанд бүртгэгдсэн тохиолдлуудыг аймгаар нь авч үзвэл Хөвсгөлд 3, Ховдод 11, Булганд 4, Сэлэнгэд 4, Архангайд 17, Өвөрхангайд 5, Баянхонгорт 1, Төв аймагт 12, Хэнтийд 1, Дархан-Уулд 19 тохиолдол бүртгэгджээ.
ЭМЯ-ны өнөөдрийн ээлжит мэдээлэлд ХӨСҮТ-ийн Вакцинжуулалтын албаны дарга О.Дашпагма оролцож вакцинжуулалтын талаар дэлгэрэнгүй мэдээлэл өгч, хэвлэлийнхний асуултад хариулсан юм. Одоогоор улсын хэмжээнд 376373 хүн вакцинжуулалтад хамрагдаж, эхний тунгаа тариулаад байгаа аж. Цаашид өдөр бүр 30 мянган хүнийг вакцинд хамруулахаар ажиллаж байгаа гэдгийг ЭМЯ-наас мэдээллээ.
