АН-ын даргыг ёсчлон батлах Их хурлыг өнгөрсөн гуравдугаар сарын 11-ний өдөр болсон ҮБХ-ны ээлжит бус хурлаар товлон зарласан гэж тус намын даргын үүрэг гүйцэтгэгч Ц.Тувааны талын удирдлагууд мэдэгдлээ. Тодруулсан, дөрөвдүгээр сарын 3-нд АН-ын Их хурлыг хуралдуулахаар товлон, зарласан юм байна.
Тиймээс маргааш болох Их хуралд 21 аймаг, 9 дүүрэг, 330 суман дахь АН-ын гишүүдийн төлөөлөл ирж оролцох юм байна. Нийт 1400 гишүүн АН-ын 8 дахь даргаар сонгогдсон О.Цогтгэрэлийг ёсчлон батлах Их хуралд төлөөлөгчөөр оролцоно гэж зохион байгуулагчид нь мэдэгдлээ. Коронавируст цар тахлын эрсдэлээс сэргийлж Их хурлыг танхимд бус задгай талбайд хийх юм байна. Их хурлын төлөөлөгчдийг түргэвчилсэн шинжилгээнд хамруулж, хуралд оруулахдаа халууныг нь хэмжин, хүн хоорондын зайг баримталж, ариутгал, халдваргүйжүүлэлтийн дэглэмийг чанд мөрдөн ажиллахаар ажлын хэсэг бэлтгэлээ базаагаад байгаа ажээ.
