“Монголын хөрөнгийн бирж” ТӨХК-ийн Гүйцэтгэх захирлын 2021 оны гуравдугаар сарын 19-ний өдрийн А-22 тоот тушаал, Санхүүгийн зохицуулах хорооны 2021 оны гуравдугаар сарын 26-ны өдрийн 96 тоот тогтоолоор “Эрдэнэс-Тавантолгой” ХК-ийн олон нийтэд нээлттэй санал болгон гаргаж буй 24-36 сарын хугацаатай, нэг бүр нь 100,000 төгрөг болон 100 америк долларын нэрлэсэн үнэтэй, 2 их наяд төгрөгийн үнийн дүн бүхий өрийн хэрэгсэл (бонд)-ийг бүртгэжээ. Энэ нь санхүүгийн зах зээл дээрх хамгийн өндөр дүн бүхий бонд болж байгаа юм.
Тус компани нь энэхүү өрийн хэрэгслийг гурван үе шаттайгаар олон нийтэд санал болгон худалдаж, 2.0 их наяд төгрөг хүртэлх санхүүжилт татан төвлөрүүлэх юм. Дотоодын хөрөнгийн зах зээлээс татан төвлөрүүлсэн хөрөнгөөр Засгийн газраас 2020-2024 онд хэрэгжүүлэхээр төлөвлөж буй стратегийн ач холбогдол бүхий төмөр зам, цахилгаан станц, сайжруулсан түлшний үйлдвэр, нүүрс баяжуулах үйлдвэр зэрэг техник эдийн засгийн тооцоолол, байгаль орчны нөлөөллийн шинжилгээ бүрэн хийгдсэн томоохон дэд бүтцийн төслүүдийг санхүүжүүлэхээр төлөвлөсөн байна.
